Саг хубилжа, Буряад дайдаарнай бурхан шажан дахинаа эршэеэ абан шэнээр дэлгэржэ, арад зомнай сүлөөтэй һүзэглэхэ, гунигаа арилгажа, сэдьхэлээ тэгшэлхэ аргатай болоо. Дэлхэй дээрэ түрэһэн гансахан наһандаа хүн гээшэ һүзэглэхэшье, али нэгэн эблэл, хамтаралнуудыешье байгуулха дүүрэн эрхэтэй. Энэнь ехэнхи ушартаа отог, нютагаараа эблэрһэн, тэрээн тойрон бүлэгэйнгөө заншал гуримуудые баримталһан байдаг. Тиигэжэ эмхидхэлэй хороон Түнхэнэй аймагай Аршаан тосхондо Отошо бурханай барилга дүүргэхэ хэрэгтэ хандиб үргэлгын марафон соносхоод байна. Һүзэг, мүргэлдөө үнэн сэхэ, һайхан сэдьхэлтэй, һайхан һанаатай үнэн нүхэднай буужа ерэхэ гэжэ найданабди. Аршаан-амаралтаар ябадалтайшье, ябадагшьегүй хүнүүдэй энэ хэмжээ ябуулгада үнэн сэдьхэлһээ хандажа, эхэ, зургаан зүйл, хамаг амитанай туһын түлөө һүзэглэн, эдэбхитэйгээр хабаадаха байһанда этигэнэбди.
Амитан бүхэндөө энэрхы сэдьхэлтэй,
Нэрэ зарлигыень соносон тэды
Гурбан хорон үбшэн бүхэниие арилгагша
Биндарияа гэрэлтэ Отошо бурхандаа мүргэмэй –
Арьяа-Баала ум маа ни бад мэ хум.
Отошо бурханай тарни:
Ом Бекандзе Бекандзе Маха Бекандзе Радза Самудгатэ Соха.
Арьяа-Баалын үршөөлтэй, аршаантай, адистай
Алтан хоймор нютагта
Хамаг олон нютаг зоной
Халуун дэмжэлгэ, үнэн сэдьхэлээр
Хайра ехэтэ нигүүлэсхы шэнжээрээ тодорһон,
Хүхэ сэнхир махабад бэеэрээ толорно.
Хонгоодор нютагуудаа тойрожо харахада:
Урдын сагай урта зади модон тоншууртай,
Уран хэблэлэй алтан гадарта “Ганжууртай”
Урдалхы “Гандан Даржалин” Хэрэнэй дасантай
Зурагтал сарюун уулата Түнхэндөө бодоод
Зуугаад мундаргануудай сууряа тодон оршоол!
Буряад дайдын Буддын шажантанда энэ һүүлэй хурдан хубилалтануудай тон ехэ удхатай, амитан зоной ажабайдалда горитой ехэ нүлөөтэй байһаниинь үнгэрһэн энэ хугасаа соо элирээд байна.
Хүндэтэ һүзэгтэд, арад зоной ашын ашада, туһын тулада үйлэдэгдэһэн бүхы уншалга мүргэлнүүд олон мянган бурхадтаа саг соогоо хүрэжэ, жиндаг бүхэнэй һанаһан хэрэг номой ёһоор бүтэжэ байхань дамжаггүй!
Хабарай hайхан сагта эхэ байгаалиин нойрhоо hэрижэ, сэсэглэн мандажа байhан үедэ нигүүлэсхы сэдьхэлтэй та оломнай эбтэйгээр сугларжа, буянтай, дэмбэрэлтэй энэ һайхан хэрэгтэ сэдьхэлэйнгээ уряалаар хабаадажа, һайхан һанаагаараа, һайхан үгөөрөө эрхилһэн хэмжээ ябуулгыемнай дэмжэхэ байһандатнай батаар этигэнэбди!
Отошо бурханай барилгын һүүлшын шатын хүдэлмэринүүдые бүтээхэ зорилгоор эмхидхэгдэһэн энэ марафондомнай хабаадаха байһан та олон нүхэдтөө эмхидхэлэй хорооной зүгһөө гүн сэдьхэлэй баяр баясхалан хүргөөд, хэтын хэтэдэ, үеын үедэ бурхантай, буянтай, өөдэргэн ябыт даа гэжэ юрөөл табинабди! Нэгэтэл энэ дэлхэйдэ хүнэй бэе оложо түрөө хадаа, хэншье һаа, жаргалтай ажаһууха дүүрэн эрхэтэйл даа. Газар дэлхэйдэ олон ондоо арадуудай хани барисаан хэтэ мүнхэдөө мандаг! Бултадаал бурханай харгалза доро ябана гээшэ бэзэбди... Энэрхы һайхан сэдьхэлээ шажан мүргэлөө һэргээхэ хэрэгтэ зорюулһан хүнэй ажаһуудал, ажабайдалынь хэзээдэшье урагшатай, эхилһэн хэрэгынь эсэс дээрээ бүтэсэтэй байха ёһотой.
Буян үйлэдэлгын тоглолтодо тайзанай мэдээжэ соёл-урлалшад хабаадаха: Бадма-Ханда, Сэдэб Банчикова, Эрдэни Батсүх, Вера Шобосоева, Ирина Шагдурова, Елена Мохосова, Цырен Шойжонимаев, Доржо Шагдуров, Чингис Раднаев, Ринчин Дашицыренов болон бусад, «Ликование», «Жонон», «Арюухан туяа», «Жэргэмэл» шуулганууд, Урлалай һургулиин оюутад.
Буян үйлдэхэ дэмбэрэлтэй энэ һайхан хэрэгтэ сэдьхэлэйнгээ уряалаар хабаадажа, хандиб үргэжэ, һайхан һанаагаараа, һайхан үгөөрөө эрхилһэн хэмжээ ябуулгыемнай дэмжэлсыт гэжэ уряалнабди! Энэрхы боди сэдьхэлэй ябуулгада хабаадажа, ехэ буян хуряахат. Энэ буянтнай саашадаа бүри арьбадажа, ашанар зээнэртэтнай заатагүй хүрэхэ байха!
Та олоной хандибаар Отошо бурхамнай хүсэндөө хүрэжэ, арамнайлагдаха зэргэтэй. Саашадаа нэгэ үдэрөөр марафон замханагүй. Эдэ бүгэдэ нэгэ жэлээр дүүрэхэгүй. Сагай хүшэртэ дарагдаад, хамаг нангин, хамаг сэнтэй юумэнүүдээ мартажархёод һуудаггүй, дэлгэр сэдьхэлтэй буряад зоноймнай хамсыгаа шамажа, хамтаржа ороһон хэрэг хэзээдэшье урагшатай байдаг. Алишье сагта хандажа байха арга байха, субаргын арамнай болоһоной удаа гунигаа даража, баяраа үргэжэ ябажа, мүргэжэ байхада Түнхэн дайда, Аршаан нютаг холошье бэшэл даа.
Иигэжэ эхиеэ абаһан Отошын субарга тээшэ арад зоной зүргэ алишье сагта мүнхэ байг!
Олон түмэнэй туһын түлөө бадарһан зулань мүнхэ байг!
Гунигаа даража, баяраа үргэдэг, бурхантай, буянтай буряад араднай мүнхэ байг!
Эхэ, зургаан зүйл, хамаг амитанай туhын түлөө мүргэл мэгзэмээрээ орхингүй алба хэжэ байдаг санаартан, анхарал хайраараа орхингүй үргэжэ, хүтэлжэ байдаг албан тушаалтан, нүхэд, айлшад, үгэ бүхэнөөрөө, алхам бүхэнөөрөө буян үйлэдэжэ, амитан зондоо энэрил хайратай байдаг ябадалтнай юрөөл боложо тодорхонь болтогой!
Буян үйлэдэлгын тоглолтын биледэй сэн 500 түхэригтэ, тэрэ биледэй арада нэрэ обогоо бэшээд, тэрэ үдэшэндөө тэндэ байһан эмхидхэлшэдтэ үгэхэ ёһотойт. Отошо бурханай арамнай дээрэ танай нэрэ обог, гэр бүлынхидтэнэй мүнхэрүүлэгдэхэ аргатай.
Биледһээ гадуур хандиблаха хүнүүдэй анхаралда:
счет РОО «Саяны»:
670000, г. Улан-Удэ, Проспект Победы, 18
ИНН 0326006760
КПП 032601001
ОГРН 1030303251439
Бурятское отделение
№ 8601 Сбербанка РФ
р/с 40703810409160105261
БИК 048142604
к/с 30101810400000000604
