Тус мүрысөөн Мэлс Жамьянович Самбуевай 80 жэлэйнь ойдо, Агуу Илалтын 75 болон Санагын дунда һургуулиин 200 жэлнүүдэй ойн баярнуудай хэмжээнүүдтэй зохилдуулан үнгэргэдэхэ. Наада эмхидхэһэн Захааминай уран зохёолшодой «Уран Дүшэ» нэгэдэл, Санагын сомон, дунда һургуули, Соёлой ордон, Захааминай хүүгэдэй урлалай һургуулиин Санагын таһаг, «Нэгэдэл» жаса уран зохёолшодые болон эдир бэшээшэдые, уран зураашадые болон дуушадые хүндэтэйгөөр урина.
Буряадаараа бэшэдэг ирагуу найрагшадай дунда
«Мэлс Самбуевай нэрэмжэтэ Уласхоорондын зохёохы урилдаан»
Буряадай Уран зохёолшодой холбооной гэшүүд, буряад хэлэ бэшэгэй багшанар, Буряадай, Монголой, Хитадай, Эрхүү можын, Үбэр Байгалай уран зохёолшодой нэгэдэлэй гэшүүд уригдана.
Февралиин 15 болотор ямаршье темэдэ зорюулжа буряадаараа бэшэһэн 5-6 зохёолнуудаа болон нэрэ обогоо, түрэһэн үдэрөө, гэрэйнгээ хаяг, утаһаа зааһан дансануудаа DarmaevaS56@mail.ru хаягаар эльгээхэ. Илагшад Захааминай аймагай Санагада уригдаха. Бүхы асуудалнуудаар: 89148487187, 890255305251, 89835391494. утаһаар хандаарайгты.
Урдахи урилдаануудта илагшад хабаадахагүй.
Шагналай жаса - 50000 түхэриг.
Захаамин аймагай эдир уран зохёолшодой
«Минии тоонто Захаамин» заншалта урилдаан
Нэгэдэхи шатада һургуулинуудтаа илаһан бэлигтэйшүүлһээ 5 – 7 болон 8 – 11 ангинуудай һурагшад поэзи болон прозо номинацинуудаар хабаадаха.
Урилдаанай онсо шэнжэ гэхэдэ, февралиин 12 болотор ямаршье темэдэ зорюулжа буряадаараа бэшэһэн 5-6 зохёолнуудаа, 2 зохёолоо уншажа байһан видеобуулгабари болон нэрэ обогоо, түрэһэн үдэрөө, гэрэйнгээ хаяг, утаһаа, һургуулияа, хүтэлбэрилэгшэеэ зааһан дансануудаа sanaginsschool@yandex.ru хаягаар «Минии тоонто - Захаамин» тэмдэгтэйгээр эльгээхэ. Урилдагшадай зохёолнуудые «Уран дүшэ» нэгэдэлэй гэшүүд, Буряадай Уран зохёолшодой холбооной гэшүүд, сэтгүүлшэд сэгнэхэ. Мүн баһа һургуулиин телевиденеэр болон сүлжээ холбооноор Вконтакте арадай дуу үгэлгэн үнгэргэгдэхэ. Номинаци бүхэндэ 1,2,3 һууринууд олгогдохо, хабаадагша бүхэндэ үнэмшэлгэ үгтэхэ. Хоёрдохи шатада илагшад Захааминай аймагай Санагада уригдаха. Тэдэнэр нэгэ шүлэг үгтэһэн темээр бэшэхэ.
Шангай жаса – 15000 түхэриг.
Бүхы асуудалнуудаар: 89140575246, 89148487187, 89835391494 утаһаар хандаарайгты.
Хабаадагшад заншалта хубсаһаараа байжа, түрэл хэлэеэ жэншэдгүй мэдэхэеэ, уран зохёолдо мээхэйгээ, уранаар уншаха шадалаа гэршэлхэ ёһотой гэжэ эмхидхэгшэд мэдээсэнэ.
Удха ехэтэй энэ урилдаанда бэлигтэй бэрхэ эдиршүүлые урихадаа, уран зохёолдо зүрхэ сэдьхэлһээ дурлажа, өөһэдөө зохёохо шадабарияа мүлижэ, Эхэ орондоо, орон нютагтаа, түрэл хэлэндээ, үндэһэн соёлдоо, түүхэдээ дурлалаа хүгжөөхэт; үетэн нүхэдтэеэ нягтаар харилсахат; мэдээжэ уран зохёолшодтой дүтөөр танилсахат гэжэ найдуулая.
«Аригуун түшэг» гэһэн республиканска интегрированна олимпиада (Буряадай һургуулинуудай 7-10 ангинуудай 1 хүбүүн, 1 басаган хабаадаха)
1 шата
- Уран үгэ. Мэлс Самбуевэй шүлэгүүдые («Минии таабай», «Хара соол», «Мамайн добуунhаа дурдалга», «Зүhэм хилээмэн») уранаар уншажа, удхыень тайлбарилжа, өөрын һанамжа дурадхаха.
- Нээлгэтэй ном (уран уншалга). Мэлс Самбуевэй номой ямаршье нюур нээгээд, уранаар уншаха.
2 шата
- Һүүдэрнүүдэй театр. 3 минутын туршада хүбүүд Мэлс Самбуевэй зохёолнуудаар зүжэглэмэл наада харуулха.
3 шата
- Басагад уранаар оёлгоор, хүбүүд модоор урлалгаар мүрысэхэ.
Шангай жаса - 20000 түхэриг.
Республиканска уран зурагаар 9 - 16 наһанай үхибүүдэй урилдаан
I шатада зурагуудайнгаа буулгабари: тоһон зураг, графика (ямаршье аргаар зурагдаһан: графитна карандаш, тушь, гуашь, акварель, темпера, сангина, сепия) sanaga.dshi@mail.ru хаягаар эльгээхэ.
II шатада хабаадаха зураашадта Мэлс Самбуевэй «Мамайн добуунhаа дурдалга» поэмэһээ хэһэг эльгээгдэхэ. Энэ үгтэһэн темээр бэлдэхэ. Түгэсхэлдэнь 2020 оной февралиин 21-дэ хабаадаха. Эндэ уран зурагаар мастер-класс, дүхэриг шэрээ үнгэргэгдэхэ.
Шангай жаса - 15000 түх.
Мэлс Самбуевэй дурасхаалай баримал бүтээлгэдэ урилдаан
Илагшын эскизээр бүтээгдэһэн баримал Санагын һургуулиин дэргэдэ табигдаха. Бүтээлнүүдээ sanaginsschool@yandex.ru хаягаар эльгээхэ.
Шангай жаса - 15000 түх.
Дуушадай «Эжын түрэhэн нютагта» урилдаан
1 шата: видеобуулгабарияа: rinbal@yandex.ru хаягаар гү, али Бальжуров Ринчин Федоровичай нэрэтэ viberтэ 89085982510 эльгээхэ. Дуушад гансаараашье болон хэдыгээрээшье, бүлэгүүдээршье хабаадаха. Арадай болон эстрадна дуу гүйсэдхэхэ.
Илагшадта лауреадуудай 3 шатын дипломууд болон ГРАН-ПРИ барюулагдаха. Урмашуулгын шангууд хараалагданхай.
Шангай жаса - 50000 түх.
Түгэсхэлэй урилдаанууд февралиин 21-дэ Санагын дунда һургуулида, урлалай һургуулида, Соёлой ордондо үнгэргэгдэхэ. Шагналгын баяр ёһололой удаа гала концерт айлшадые баярлуулха.
