- Түрүүшын үдэрэй тоглолто үндэр хэмжээндэ үнгэрөө. Буряад соёлой баялиг харуулжа шадаабди. Тоглолто хараһан хүнүүд энэ үдэшэ халуунаар угтажа, зүрхэ сэдьхэлээрээ баясаа. Буряадһаа гарбалтай хүнүүд ехэ омогорхожо байгаа. Анха түрүүшынхиеэ Буряад оронтой танилсажа байһан хүнүүд гайхаа, бахархаа. Манай артистнарай харуулһан тоглолто харагшадта хадуугдаа – энэнь шухала, - гэжэ Буряадай Толгойлогшо тэмдэглээ.
Энэ үндэр хэмжээнэй тоглолтодо хэгдэһэн бэлэдхэлэй ажал тухай Алексей Цыденов тодорхойлоо.
- Гурбан үдэрэй туршада тоглолто харуулха түсэбтэй байгаабди, теэд репетици үнгэргэхэ хэрэгтэй ушарһаа хоёр үдэрэй тоглолто бэлдэгдээ. Олон зон тоглолто хаража, Буряад уластай дүтөөр танилсахаяа ерэхэ. Түрүүшын тоглолтын һүүлээр олон хүнүүд: «Би заатагүй таанадта айлшалжа, өөрынгөө нюдөөр хараха хүсэлтэйб”, гэжэ хэлээ. Буряад уласта ерэһэн айлшан бүхэн баяртайбди, олзын хэрэгшье урагшалха», - гэжэ уласай хүтэлбэрилэгшэ онсолоо.
Москва хотын Кремльдэ үнгэргэгдэһэн Сагаалганай тоглолтодо Буряад Уласай зохёохы долоон бүлэгүүдэй 290 зүжэгшэд ерэһэн байна. Эгээл эдир хабаадагшань – 9-тэй, эгэл аха захань – 70 наһатай гээд тэмдэглэлтэй. Энэ үдэшэдэ оперо, балет, цирк, эстрадын дуушад, этнофольклорно болон мүнөө үеын хатар харуулагдаа.
Тоглолтын хоёрдохи үдэшэшье Буряадай зүжэгшэдэй тоглолто олон харагшадые суглуулаа. Уридшалһан мэдээгээр, 11 мянган хүн тоглолто хараһан байна.
