Мэргэжэлтэ зүбшэлэгшэдэй шиидхэбэри Ород гүрэнэй Соёлой яаманай сайтда бэшэгдэнхэй. Александр Бородиной «Князь Игорь» гэһэн оперо табилгада 13 сая түхэригэй грант дамжуулагдаха.
Анха түрүүшынхиеэ энэ оперо 1950 ондо табигдаа, удаань 1959 ондо шэнэлэгдэжэ, бүхы Совет гүрэндэ мэдээжэ болоһон байна. «Князь Игорь» гэһэн Буряадай оперо болон баледэй театрта саг үргэлжэ табигдажа, удаан сагта энэ оперо театрай хаһа нээлгэдэ, хаалгада табигдадаг һэн. Тиихэдэ гол рольнуудые Буряадай мэдээжэ дуушад Лхасаран Линховоин, Саян Раднаев, Бадма Балдаков, Ким Базарсадаев гэгшэд гүйсэдхэһэн юм.
Буряадай оперо болон баледэй залуу дуушад ородой оперын зэндэмэни шэнээр табилгада хабаадажа, дуулаха бэлигээ дүүрэн гэршэлхэ аргатай. Харагшадта тайзанай шэнэлэгдэһэн шэмэглэл, видео-, аудио тоног хэрэгсэлнүүдые ашаглан табигдаха оперо хараха арга олгогдоно. Байгша 2020 ондо оперо табигдаха юм.
Үнгэрһэн долоон хоногто Буряадай оперо болон баледэй театр Кремлиин ордондо үнгэргэгдэһэн Сагаалганда хабаадаа. Театрай хатаршад февралиин 29-дэ «Алтан баг» фестивальда «Талисман» гэһэн балет табиһан байна гэжэ һануулнабди.
