Мүнөө сагта буряад араднай түрэл хэлэеэ, соёлоо, уг гарбалаа, ёhо заншалаа шадал соогоо хүгжөөхые оролдоно. Буряад хэлэ һургуулида зааха,
залуу үетэнөө түрэл хэлээрээ хөөрэлдэжэ һургаха гэхэ мэтын тон шухала зорилгонууд гүрэн түрын хэмжээндэ зүбшэгдэдэг болонхой.
Сагаа һарын һайндэрэй үедэ Буряад орондомнай эгээл сэбэр Дангина басагад, бар хүсэтэй Баатар хүбүүд шэлэгдэдэг. Иимэ харалга-мүрысөөн Буряад орондо 1990 онһоо үнгэргэгдэнэ. Буряад Уласай cоёлой, Һуралсалай болон эрдэм ухаанай яамануудай, Арадай уран бүтээлэй түбэй аша
оролдолгоор һайхан энэ хэмжээ ябуулга эхи абаһан түүхэтэй. Энэ харалган имагтал ургажа ябаһан залуушуулаа элинсэг хулинсагуудайнгаа энэ болотор сахижа ябаһан ёһо заншалда, жэнхэни буряад хэлэндэ хабаадуулха, зүгөөр дууша, хатарша бэлигтэй бэрхэ үхибүүдые элирүүлхэ, хүмүүжүлхэ гэһэн гүнзэгы удхатай хэрэг мүн болоно.
Аяар 25-дахи жэлээ эмхидхэгдэжэ байһан энэ ехэ харалгамүрысөөндэ Буряад ороноймнай хэды олон хүбүүд, басагад бэлиг шадабарияа мүлин хабаадажа, ажабайдалайнгаа үргэн харгыда гараа гээшэб. Тэдэнэй олонхинь ажабайдалдаа амжалтатай, зориг эрмэлзэлтэй, түрүү хүнүүд
болонхой. Жэшээнь: Лариса Батуевна Будожапова 1990 оной түрүүшын харалганда хабаадажа, «Дангина» нэрэ зэргэдэ хүртэһэн байна. Мүнөө Лариса Батуевна гүн ухаанай эрдэмэй кандидат, БГУ-гай багша, «Эдир Дангина-1998» Эржена Даши-Доржиевна Биликтуева улаан дипломоор Санкт-Петербургын Гүрэнэй Полярна Академи дүүргээд, удаань Франциин Версаль хотын Экономикын университедэй магистратура эрхимээр дүүргэжэ, тиин эрдэмэй кандидадай диссертаци хамгаалһанайнгаа удаа Бельгиин ниислэл Брюссель хотодо хүдэлнэ. «Эдир Дангина-2000», мүнɵɵ Буряад Уласай габьяата зүжэгшэн Имин Цыдендамбаева, дэлхэй дүүрэн суутай Дю-Солей циркын шоу-нааданда хабаадалсана.
Жэлһээ жэлдэ мүрысөөн харагшадайнгаа дунда һайшаагдан, улам үндэр хэмжээндэ гаранхай. Хабаадагшадшье олошороо. Үбэр Байгалай хизаарай Агын, Эрхүү можын Усть-Ордын буряад тойрогуудһаа зохидхон сэбэр басагад, шамбай шадалтай хүбүүд Улан-Үдэдэ дүй дүршэлөө, ухаан бодолоо, баян буряад хэлэеэ буляалдан андалдахаяа ерэнэд.
Саг сагаараа,
сахилза хүхөөрөө
гэдэгтэл даабаринуудай шэнэ маягаа, өөрсэ удхатайгаар зохёогдон хубилгагдахань зүгөөрөө.
Саашадаашье «Баатар. Дангина» гэһэн гаршаг доро үнгэргэгдэдэг энэ мүрысөөмнай ургажа ябаа улаан бургааһадаа зүб мүрөөр үндылгэхэ хэрэгтэ онсо нүлөөтэй үлэхэнь дамжаггүй.
Тус ном эндэ татажа абахада болоходо.
