Номой оролто болгожо, автор иигэжэ бэшэнэ: «Уран зохёолой жэгүүртэ дошхон хүлэгые хурса ухаан бодолой торгон бугууляаар барижа, тэрэ эмнигээ хазаарлажа, эмээллэн һургажа унаад, зохёохы орёо ажалай замда гаража, уран зохёолой Һүмбэр уула өөдэ зохёохын урмаар эрмэлзэн
дабшаха уран зохёолшо бүхэнэй үндэр хуби заяан болоно ха юм даа.
Би багаһаа аха нүхэдэйнгөө арадайнгаа үльгэр домог, онтохо үгүүлэл хөөрэлдэхыень һонирхон шагнажа, үзэг бэшэг мэдэхэ болоходоо, үльгэр онтохо, уран зохёол уншаһаар өөдөө болоо гээшэб. Уншаһан номуудайнгаа удха нүхэд хүбүүдтээ хөөрэхэдөө, бүри һонин болгохо гэжэ оролдон, өөрынгөө һанаанһаа нэмэжэ байгаад хөөрэгшэ һэм. Эжытэеэ гү, али абгайтаяа хони мал адуулжа ябахадаа, али баабайтаяа мори тэргээр харгыда ябахадаашье, уншаһан зохёолнуудаа хөөрэжэ бахаяа ханагша һэм.
Зургаадахи класста һуража ябахадам, буряад хэлэнэймнай багша гэрэй даабари үгэбэ гээшэ: нүгөө хэшээлдээ шүлэг бэшээд ерэхэт гэжэ! Бидэ бултаараа багшаяа гайхалдан гэтэжэ, багшын хэлээшэ арсашагүй ха юм гэжэ ойлгодог дээрэһээ аниргүйхэнүүд зүбшөөрэн һуугаа бэлэйбди. Би
хоёр шүлэг бэшээд ерээ һэм. Багшамнай тэрэ хоёр шүлэгыем һайшаан магтажа, классай урда уншажа, һүүлдэнь һургуулиингаа ханын сониндо гаргаба гээшэ. Намайе үхибүүд «поэт, поэт» гэлдэдэг болошоо һэн. Би энээндэнь дурагүйдөөшье һаа, ойлгосомнай тиимэхэн байһан ааб даа,
шүлэгүүдые бэшэжэ туршадаг болоо бэлэйб.
Тэрэ гэһээр лэ сүлөө саг олоод лэ, шүлэг зохёол бэшэхые оролдодог болоһон байнаб. Аймагайнгаа, республикынгээ сонинуудта шүлэгүүдээ гаргуулдаг боложо, түрүүшынгээ алхам уран зохёолой Һүмбэр уула өөдэ хэһэм тэрэ бэлэй. Бэшэжэл ябахадам, бэшэһэн зохёолнуудни олон боложол, боложол байгаа бэзэ. Шүлэгшье, онтохошье, үгүүлэл хөөрөөнүүдыешье, таабаринуудыешье гэхэ мэтэ олон янзын зохёолнууд бэшэгдээ даа. Поэт бүхэн инаг дуран тухай бэшэдэг ха юм даа. Бишье баһа инаг дуран тухай шүлэгүүдые бэшэжэл ябааб. Тиигээд лэ инаг дуран тухай шүлэгүүдни ехэ олон болошоо юм. Тэдэнээ ном болгожо гаргаа һаам, дүрбэн зуугаад нюуртай ном болохо байна. Тэрэ номоо «Инаг дуранай баглаа» гэжэ нэрлээд, бүхы инагуудта зорюулан хэблэн гаргаха хүсэлтэйб. Сагаалган тухайшье шүлэгүүдни ехэ олон юм. Тэдэнээ баһал тусгаар ном болгожо гаргаха һанаан байха. Зохёолнуудыем хаража үзэбэл, хоёр, дүрбэ, найма мүртэйшье шүлэгүүд байха, хөөрөөн рассказуудшье,
үльгэр онтохоншье, зүжэгүүдшье гэхэ мэтэнүүд байха.
Буряадай номой хэблэлдэ түрүүшынгээ ном гаргажа байхадам, редактор хүбүүд намда хэлээ һэн: «Ши, Эрдэни, үхибүүдтэ зорюулһан зохёолнуудые бэшээд туршал даа». Туршаад лэ үзэгдөө һэн. Тиигээд лэ «Хүүгэд бидэ барандаа», «Минии гэр» гээд лэ хүүгэдэй номууд гаража эхилһэн юм.
Гансашье хүүгэдтэ бэшэ, ехэшүүлдэшье зорюулһан зохёолнууд бэшэгдээ, бэшэгдэжэшье байдаг.
«Хори ― алтан һүлдэмни» гэжэ номдо нютаг нуга, эхэ эсэгэ, үйлэ ушарнууд, үргэл мүргэл, сэдьхэл зүрхэнэй шанар тухай гэхэ мэтэ элдэб зохёолнууд оронхой. Буряад зоной һанаа сэдьхэлдээ нангилан шэнгээжэ, урда холын удхатай, буурал сагай намтартай, гандашагүй гарбалтай зомди гэжэ дээдын омогорхол түрэжэ, түрэлхи буряад хэлээрээ хөөрэлдэжэ, буряад алдар нэрэеэ дээгүүр үргэжэ ябаһайбди гэжэ ехэтэ хүсэжэ ябадаг хори буряад хүмби даа. Үдэршье һүнишье ухаандаш ялас гээд ерэһэн бодолнуудаа түргэн зуура саарһан дээрэ бэшэн нөөсэлжэ, богонишье, уташье зохёолнуудые бэшэхэдээ, тэдэнээ хэблэхэ гээшын хүшэр хүндэһөө голхороодшье абаа һаа, тунхарингүй
бэшэхэ эрмэлзэлээ үшөөл хурсадхажа ябахадаа, жаргалтайл хүмби гэжэ өөрыгөө һанагшаб».
Энэ ном эндэ татажа абахада болохо.
