Энэ жэл коронавирусна инфекциин тарахагүйн тула Агууехэ Эсэгэ ороноо хамгаалгын Дайнай дурсалгада зорюулһан хэмжээнүүд онлайн-гуримда оробо. Эдэ хубилалтанууд тухай Буряад Уласай Соёлой яаман мэдээсэнэ.
Энэ жэлэй «Библионочь» гэһэн Бүхыроссиин хэмжээн түрүүшынхиеэ бүхыгөөрөө Интернедтэ үнгэрхэ, Агууехэ Илалтын 75 жэлэй ойдо дашарамдуулагдаха. Энэ ябадал Буряад Уласай Үндэһэтэнэй Номой Һангай ВКонтакте гэһэн сүлжээндэ эзэлдэг талмай дээрэ үзэхөөр. Эндэмнай лекцинууд, шууд-эфирнууд, һонин сэдэбтэй статьянууд, викторина, урилдаан-мүрысөөнүүд, мэдээжэ зонтой интервьюнууд үнгэрхэ.
Апрелиин 23-да эхилһэн Бүхыдэлхэйн Номой Һайндэрһөө эхилээд, виртульна хэмжээнүүд эхилбэ. Өөрөө «Библионочь» апрелиин 25-да, субботада, үдэрэй 12-һоо үдэшын 10 болотор болохо. Танда хэрэгтэй хэмжээнүүдые олохын түлөөө, хэштегнуудые хэрэглэгты: #ЛекторийБиблионочи, #ВыставкиБиблионочи, #СтатьиБиблионочи, #ГолосПобеды, #ИнтерактивБиблионочи, #ВоспоминаниеМоегоДеда
Дайнда хабаадалсаһан сэрэгшэд тухай дурсамжанууд майн 9 болотор сахим (электрон) ном соо хэблэгдэхэ.
Улас Түрын үхибүүдэй болон эдиршүүлэй Номой һан «Буряадай уран зохёолшод ба ирагуу найруулагшад дайнда» гэжэ гурбан кино буулгаһан байна. Эдэ кино номой һангай талмай дээрэ Бүхыроссиин онлайн-марафоной хэмжээндэ #75словПобеды» хэблэгдэхэ.
Тэрээнһээ гадна Улас Түрын үхибүүдэй болон эдиршүүлэй номой һан «4 жэл – 4 хэшээл» гэһэн түсэл YouTube дээрэ эмхидхээ:
1-дэхи хэшээл «Москваагай дайлдаан» тухай
2-дохи хэшээл «Сталинградай дайлдаан»да зорюулагдана
3-дахи хэшээл «Белоруссиин «Багратион» дайшалхы ябуулга(операция)»
4-дэхи хэшээл «1945 оной майн 9– Илалтын Үдэр».
Эдэ видеохэшээлнүүдые апрелиин 1-һээ үзэхэдэ болоно.
- «Дурсалгын түүдэг - Огонек памяти» -гэһэн түсэлдэ Эсэгэ Ороноо Хамгаалгын Дайнда зорюулагдаһан гэр бүлын, али өөрын дурсамжа, дуу, шүлэгөөрөө хубаалдахаа һанаһан зон хабаадалсахаар. Апрелиин 25-һаа, арбан үдэрэй туршада, libbur@yandex.ru гэһэн хаягаар видеоролигоо эльгээхэдэтнай, тэрэтнай Номой һангай ютубта, сайт дээрэ гараха.
- Виртуальна үзэсхэлэнгүүд: «Уншаһан дайн тухай ном – Геройнуудта бэлэг», «Буряад ороной уран зохеолшод Эсэгэ Ороноо Хамгаалгын Дайн тухай», «Дайн тухай сахим номууд Юрэнхылэгшын номой һанһаа».
- Хүүгэдэй дайн тухай уран зурагуудай үзэсхэлэн «Дайн түгэсөө, харин баатаршалга мүнхэдөө» Улаан-Үдэ хотын «Созвездие» гэһэн нэмэлтэ һуралсалай түбэй «Паскаль» студиин һурагшад хабаадалсана (хүтэбэригшэ - Шелехова О.Н.).
- «Рысь» гэжэ патриотическа бүлгэмэй хүтэлбэрилэгшэнүүд Владимир Ефремов ба Артем Туголуковтай интервью. Хайшан гээд сэрэгшэдэй үлэгдэлнүүдые бэдэрдэг тухайгаа ютубта хөөрэнэ.
Улас Түрын Уран Бэлигэй Түб Инстаграм сүлжээндэ «Илалтын шүлэгүүүд - Стихи Победы» челлендж эмхидхээ. Олон хабаадагшад Агууехэ Эсэгэ Ороноо хамгаалгын дайнда зорюлагдаһан шүлэгүүдые уншаһанаа видеодо буулгаад, #стихипобеды75 хэштегтэйгээр Инстаграмда табина. Энэ хэмжээндэ аймагуудай 80 гаран ажаһуугшад эдэбхитэйгээр оролсоо. Онсото һайнаар Хориин, Түнхэнэй аймагуудай, Северобайкальск ба Улаан-Үдэ хотонуудай соёлой байшангуудай ажалшад оролсоно гэжэ тэмдэглэмээр.
2019 онһоо Дайнда хабаадалсаһан геройнууд тухай номууд хэблэгдэнэ. Хараалагдаһан 4 ботинуулһаа түрүүшын гурбаниинь Советскэ Союзай Геройнуудта зорюулагдана, дүрбэдэхиниинь – Орден Славы абаһан кавалернуудта
Ном бүхэн оролто үгэтэй, Геройнууд ба Кавалернуудай гаршагтай. Статья соо Геройн зураг, нэрэ зэргэдэ оруулһан указай хэһэг, 20-25 хуудаһанай статья. Түрүүшын номой бии бололгын баяр Үндэһэтэнэй Музейн «Агуу Илалта» үзэсхэлэнэй нээлтэ дээрэ үнгэрхэ.
Агууехэ Илалтын 75 жэлэй ойдо зорюулагдаһан гурбан үзэсхэлэн ажаллаха гэжэ Буряад Уласай Үндэһэтэнэй Музей мэдээсэжэ байна.
Апрелиин 29-һээ Цыденжаб Сампиловай нэрэтэй Уран һайханай музейдэ «Уран зурааша дайн тухай» ба Георгий Москалевай зурагуудай үзэсхэлэн хүдэлхэнь. Москалев хадаа Агууехэ дайнда хабаадаһан Советскэ Союзай Герой, Буряад АССАРэй Арадай уран зурааша, РСФСРэй Габьяата уран зурааша гэжэ һануулая. «Уран зураашад дайн тухай» үзэсхэлэндэ И. Тоидзе, С.Герасимова, К. Юона, Л. Крылова гэгшэдэй болон буряад зураашад Ц.Сампиловай, Р. Мэрдыгеевай, Г. Павловай, И. Аржиковай бүтээлнүүдые харахаар.
Бүхы эдэ хэмжээнүүд мүнөө сагай эрилтээр онлайн, видеоэкскурсиинуудай, репортажнуудай хүсөөр бэелүүлэгдэхэ. Жэшээнь, “Уран зураашад дайн тухай” ба Москалевай үзэсхэлэнгүүд тухай дэлгэрэнгы кино Буряадай Телерадиокомпани майн 9 болотор бэлэн болгоходонь, Соёлой Яаманай ба Үндэһэтэнэй Музейн мэдээсэлэй талмайнуудаар тараагдаха.
Матвей Хангаловай нэрэмжэтэ Түүхын Музей урда хөөрэһэн «Великая Победа» / Агуу Илалта гэһэн үзэсхэлэн бэлдэнэ. Хэдэн бүлэгһөө бүридэһэн үзэсхэлэндэ бодото документнуудые, гэрэл зурагуудые, хубиин зөөри, бэшэгүүдые, тэрэ үеын буу зэмсэгүүдые ба г.м. юумэ харахаар. Тэрэнэй нээлгэнь онлайн гуримаар, видеоэкскурси ба гэрэл зурагуудай репортажай хүсөөр үнгэргэхөөр хараалагдана.
Энэ үзэсхэлэн тухай кино АТВ телекомпани бэлдэжэ байна. Баһал бүхы талмайнуудар тараагдаха.
Тэрээнһээ гадна Үндэһэтэнэй Музейн мэдээсэлэй талмайнууд дээрэ манай нютагаархидай эльгээһэн Дайнда хабаадагшадай гэрэл зурагууд табигдаха.Эдэ зурагууд Музейн Сахим Буйлалгын Түбэй (Центр цифровой обработки) «Данай Геройнууд» гэһэн түсэлэй хэмжээндэ ороно. 2015 онһоо эхилээд, 1100 дээшэ гэрэл зурагууд, документнууд Музейн жасада оруулагдаа.
Эдэ хэмжээнүүдтэ эдэбхитэйгээр манай театрнуудай артистнар оролсохо. Майн 9-нэй 17:00 сагһаа 18:30 болотор Россия-24 Телеканал дээрэ гое тоглолто гурбан газарһаа харуулагдаха: Оперо болон баледэй театрһаа, Уран һайханай музейһээ, Ород драмын театрһаа.
Ород, Буряад драмын театрнуудай, Филармониин, дуу хатарай «Байгал» театрай зүжэгшэнэр харагшадтаяа уулзахаар бэлэн.
Тэрээнһээ гадна бүхы соёлой эмхи зургаануудай ажалшад «Хэтын жаса», «Дурасхаалай мүнхэ зула» (Свеча памяти) акцинуудта хабаадаха. Сонходоо дайнда хабаадаһан бүлынгөө гэшүүдэй зурагыень табиха, 21.00 сагта салюдай эхилхэдэ, дурасхаалай зулануудые бадарааха.
Соёлой мэдээсэлнүүдые мэдэхын тула - манай Viber бүлгэмдэ орогты https://invite.viber.com/?g2=AQAKKGBz%2BRVOOEpE85huGWyajP34bP6XexT7POE8HtzFy16vUeJgLnNrlWK5Fwdc в Viber
