Хүндэтэ уншагшад!
Хэдэн зуун жэлдэ үеһөө үедэ дамжан ерэһэн, эжын уурагтай бэедээ шэнгээһэн эхэ буряад хэлэеэ, түүхэ домогоо, үльгэр туужаяа, уран
зохёолоо, зан заншалаа, дуу хүгжэмөө хойто үедөө үлээхын тулада «Мүнгэн тобшо» сайт нээгдээд, энэ ажал зургаадахи жэлээ ябажа
байна.
Уласай түрын дуулал зохёоһон ирагуу найруулагша Дамба Зодбич Жалсараевай 90 жэлэй ойдо зорюулагдаһан «Минии уг гарбал»
интернет-мүрысөөн 2015 оной туршада ажаллаа, энэл мүрысөөн элитэ уран зохёолшо Даширабдан Батожабайн 95 жэлэй ойдо зорюулагдаад, 2016 оной туршада үргэлжэлөө һэн. Интернет-мүрысөөнүүдтэ илалта туйлаһан 87 хүбүүд, басагадта грамотанууд, мүнгэн шангууд барюулагдаа һэн.
Зорилго урдаа табихадаа, буряад арад түмэнэй үри сада гээшэб гэһэн мэдэрэл үхибүүн бүхэндэ түрүүлхэ, угаа уудалан шэнжэлхэдээ үхибүүд эхэ буряад хэлэндээ эльгэтэй болохо, угаа һонирхоходоо, үбгэн аба, хүгшэн эжыдээ, нагаса эжы абадаа хандахадаа, тэдэнэрээрээ харилсахадаа, эхэ хэлэеэ мэдэдэг болохо тээшэнь татаха гэһэн зорилготой байгаабди, угайнгаа түүхэ, түрэл арадайнгаа түүхэ һонирхоходоо, түрэл хэлэнэйнгээ
баяниие ойлгодог болохо байха гэжэ найдаабди.
Үхибүүд шэнжэлхэ ухаанай дүршэлтэй болохо, мүнөө сагай цифровой оньһон түхеэрэлгэ буряад хэлэ үзэлгэдэ хэрэглэхэ байха гэһэн зорилготой байгаабди. Үшөө юун шухала байгааб гэхэдэ, гэр бүлын һүр һүлдэ дээшэлүүлхэ. Арадай түүхэ бүлын түүхэтэй нягта холбоотой, бүлын хубида болоһон ушарнууд, түүхэтэ хүнүүдэй хуби заяан, тэдэнэй ажал хэрэг үхибүүдэй анхарал татана. Энэ анхаралыень алдуулангүй байха манай зорилго.
Арад түмэнэй түүхэ уг гарбалай унгиһаа эхи абана. Угай һарбаалжан түүхын гүн руу абаашана. Уг гарбалаа шэнжэлхэдээ, үхибүүд
өөрынгөө элинсэг хулинсагай ажабайдал мэдэхэ болоно, мүнөө мэндэ байһан түрэл гаралтаяа танилсана, нютаг нугаяа, эхэ
байгаалияа гамнажа, хайрлажа һурана.
Хоёр жэлэй туршада «Мүнгэн тобшо» сайтын бүтээһэн интернет-мүрысөөндэ 200 гаран үхибүүд хабаадаһан байна. Тэдэнэр уг
гарбал, удам түрэл тухайгаа зохёол буряадаар бэшэһэн, үеһөө үедэ дамжан ерэһэн угайнгаа түүхэ домог, угайнгаа элитэ түрэл хүнүүд тухай
хөөрэһэн, өөрынгөө угай бэшэг шэнжэлһэн, угай һарбаалжан тухай хөөрэһэн, угайнгаа һүлдэ тэмдэг гоёор зураһан байна.
Интернет-мүрысөөндэ хабаадаһан 87 хүбүүд, басагадай зохёохы ажалнууд «Минии уг гарбал» ном соо хэблэгдэбэ. Бэе бэеэ нэгэшье
дабтаагүй домогууд, хөөрөөнүүд, ушаралта ябадалнууд ба намтарнуудые уншахада ямар һонин гээшэб!
Тус номтай эндэ татажа танилсаха аргатайт.
