Түрүүшээр мэдээжэ «Дангинамни» гэжэ дуу гүйсэдхэһэн талаантай залуу эхэнэр мэргэжэлээрээ дизайнер юм байна. Һургуулидаа буряад хэлэ үзэдэг һэн тула, буряад хэлэндэ дүй дүршэлтэй.
- Дуулахадаа акцентгүгөөр дуулана лэ, - гэжэ харагшад һонирхоно.
Энэ удаа залуу бэлигтэн «Намжаа үдэшэ» гэжэ дуу уран һайханаар гүйсэдхэбэ.
- Зунай сагта дуу дуулаха дурамни хүсэтэй болодог. Эдир 15 наһатайдамни манай хүршэ Очир гэжэ хүбүүн энэ дуу гитараар хоройн газаа дуулагша һэн. Олон үхибүүд сугларжа дуу дуулалсадаг, волейбол наадагша бэлэйбди. Хоер жэлэй саана тэрэ хүбүүн нүгшөөшье һаа, энэ дуугай аялга дуулахадаа, тэрэ нүхэрөө ходо дурсадагби, - гэжэ Анастасия хөөрэнэ.
- Һанажа хадууһанайнгаа шадалаараа дуулаһан намайе хатуугаар бү сэгныт даа, - гэнэ.
Тиибэшье, олонхи зон дуушаниие һайхашаахаһаа гадна, Полина Гагарина зүжэгшэнтэй адлишаана.
НАМЖАА YДЭШЭ
хүг. Данзан Бальжинимаевай
үг. Дулма Ринчиновагай
Намарай һайхан һарануудай
Номин намжаа үдэшэ
Эгээл түрүүшын дуран
Эльгэ зүрхым бадаруулаа.
Дабталга:
Урдаһаам намай шэртээд,
Урихан нюдөөр хаража,
Гараа һарбайн, аалихан,
Галта хүсэлөөр тэбэреэш.
Сэлмэг хүхэ тэнгэри доро
Сэнгэжэл шамтаяа ябахадаа,
Сэдьхэлдэм бадарнал нангин мүшэд -
Сэбэр дуранайм шэдитэ хүсэн.
Дабталга:
Урдаһаам намай шэртээд,
Урихан нюдөөр хаража,
Гараа һарбайн, аалихан,
Галта хүсэлөөр тэбэреэш.
