«Соёлой үүсхэл» гэһэн олон ниитын бүлгэмэй (Москва) ударидагша Елена Алиева энэ проект эмхидхээ. Тиихэдэнь манай Буряад нютагаймнай «Байгалые хамгаалагшад» гэсэн олон ниитын бүлгэмэй ударидагша Дулма Содномова дэмжэжэ, Харгана нютагай Соёлой эмхи зургааниие хүтэлбэрижэ ябадаг Елена Бальжиеватай суг хамта энэ проект бэелүүлээ.
«Энэ түсэлөөр хадаа аяншалшадаараа андалдажа, Москваагайхид Харганаархидэй гэртэ ажамидараа, гэртэхинтэйнь танилсажа, ехэ нүхэсэбэ. Тиигээд октябрь һара соо бидэн өөрынгөө «түрэлхидөө» Москвада угтажа баһа гэртээ байлгуулхабди, гоё үзэсхэлэниие харуулхабди, танилсуулхабди», - гэжэ Елена Алиева хөөрэнэ.
Энээхэн юһэн үдэр соо айлшадаа угтахын тула Харгана нютагай соёлой ажалшад, нютагаархид, ТОСууд ехэ томо соёлой программа бэлдэһэн байна. «ТОС "Перспектива.ru» гэһэн булгэмэйхид айлшадаа угтахын, бэе тамир hайжаруулхын тула, соёлой программа хэлсэжэ, бэе бэетэйгээ уулзажа, үдэр бүхэнэйнгөө түсэбые сасуулжа, шалгажа байгаа. Ягодное, Новоселенгинск, Селендума, Тамша hууринуудай соелой ажалшад, ТОСуд айлшадаа угтажа, соёлтой, урданай байра байдалтай, буряад еһо заншалтай танилсуулба.
«Энэ түсэл намда ехээр hайшагдаа. Юундэб гэхэдэ, энэ түсэлэй хабаадагшад жаратай далатай. Эдэниие хүгшэд үбгэд гэжэ хэлэхээршье бэшэ. Бултандаа хүхюутэй, зугаатай, юумээр hонирхожо бэе ухаан hайтай, сэдьхэл үргэн жаргажа ябана. Энэ түсэбэй гол зорилго хадаа табин табаһаа эхилээд лэ үнэгүйгөөр аяншалха. Иимэ проектнуудые бэдэржэ суг ажалалга ябуулха хэрэгтэй», - гэжэ Дулма Содномова дурадхаба. Тиигээд үшөө Сэлэнгын аймагай гулваа Станислав Дашиевич Гармаев, Светлана Добчиновна Бубеева хоер энэ проект аймаг соогоо бэелүүлхын тула өөрынгөө ехэ нүлөө үзүүлһэн байна. Иигэжэ бага нютагуудые хүгжөөжэ байхадань баяртай байна.
Юунэй урмаар энэ проект бэелүүлэгдээб гэхэдэ, нэгэдэхеэр, иимэ аяншалга Ород Уласай толгойлогшын граантаар хэгдээ, хоердохеор, мартын хориндо Харганада Проектнэ сесси үнгэргэгдөө. Тэндэ Ханда Очировна «сугтаа түрэл тоонто Харгана нютагаа таталгын түб болгоое, манай эндэ эхын умай, зомнай, археологическэ хүшөөнүүд, онсо соёл, hонин түүхэ би ха юм», - гэжэ нютагайнгаа зондо хандаһан. Гурбадахяар, Харгана нютаг эдэбхитэйгээр оролдосотойгоор эгээл эхинhээнь Елена Бальжиевагай хүтэлбэри доро хабаадаа. Дүрбэдэхеор, «Соёлой үүсхэл» гэһэн бүлгэмэй хүтэлбэрилэгшэ Елена Алиева олон жэл соо «Туйлажа шадаhан амаралта» гэһэн түсэлөө эдэбхитэйгээр хүгжөөнэ, энээнээ олон зондо дамжуулхын тула түрүүшынхиеэ манай Буряад орондо хэжэ туршаба. Нютагаархидни, үүдэеэ үргэнөөр нээжэ, зүрхэ сэдьхэлэйнгээ баялигые бэлэглэебди!
