Цыбен Жамцараногой нэрэмжэтэ Үбэр-Байгалай номой сангай хүдэлмэрилэгшэд, алдарта уран зураашын ажалнуудые суглуулжа, фотоальбом болгожо гаргаа. Тэрээн соонь Доржи Гомбоевичай гэр бүлын архивта хадагалаатай, мүзейнүүдһээ болон бусад газарнуудһаа суглуулагдаһан зурагууд, дархалһан зүйлнүүдэй фотозурагууд тайлбаритайгаар уншагшадта дурадхагдана.
Танилсалгада Доржи Гомбоевичай хүүгэд, Агын багшанарай училищидэ суг хүдэлһэн нүхэдынь, Агын тойрогой толгойлогшо Буянто Батомункуев, уран зураашад, сурбалжалагшад сугларжа, уран зураашые дулааханаар дурсабад.
Фотоальбомтой танилсалгын хажуугаар Г.Цыбиковэй нэрэмжэтэ Агын үндэһэн музейн хүдэлмэрилэгшэд уран зураашын зурагуудай үзэсхэлэн эмхидхэбэ. Зураг бүхэн тухай Доржи Гомбоевичай шаби Баярма Казанцева сугларһан зондо хөөрэжэ үгөө.
Хэмжээ ябуулгын түгэсхэлдэ уригдаһан айлшадта фотоальбомууд бэлэглэгдээ.
