- Тус үзэсхэлэн үни заяанай хүлеэгдэһэн байгаа, одоошье мүнөө эндэ дэлгэгдэһэндэнь бидэ тон ехэ баяртай байнабди. Бэлигтэй уран зурааша нютагайнгаа хүбүүгээр бидэ ехэ омогорходогбди. Тэрэнэй бүтээһэн ажалнууд соо танил тала болоһон дүрэнүүдые харанабди, - гээд, Буряад Уласай соёлой сайд Соёлма Дагаева хөөрэнэ.
Ород арадай байгуулһан агууехэ һургуулиин түлөөлэгшэ байбашье, уран зурааша Зорикто Доржиев өөрынгөө арадай үндэһэн маягуудые оруулжа, ажалаа бүтээдэг юм. Тиимэһээ хаанашье - Венецидэшье, Улаан-Үдэдэшье, Москвадашье ажаһуугаа арад зондо тэрэнэй бүтээлнүүд адли һонирхолтой.
- Түрэл нютагтаа байхадаа, хэзээдэшье минии зүрхэн хүлгөөд абадаг. Буряад орондоо өөрынгөө ажалнуудые дэлгэхэдээ, намда ехэ харюусалгатай, тиигэбэшье би ехэл баяртай байнаб. Тала гээшэ нүүдэлшэ арад зоной ажамидардаг захагүй үргэн газар дайда ха юм даа. «Шэнэ тала» гэһэн үзэсхэлэн соогоо Европын арадуудай байдал һуудал соо иимэ захагүй үргэниие харуулха гэжэ оролдооб. Энээн соо арад зоной хоорондохи зүрилдөөн, ехэ зөөдэл, соёл уралигай худхаляа тухай һанамжалмаар зүйлнүүд байха, - гэжэ Зорикто Доржиев хэлэнэ.
Энэ үзэсхэлэндэ 40 гаран шэнэшье, урид харуулагдаһаншье ажалнууд оронхой.
