Энэ үдэртэ дашарамдуулан, Х.Намсараевай нэрэмжэтэ Буряад драмын театрта театрай зүжэгшэдые шагналгын «БРАВО -2021» гэһэн ёһолол үнгэргэгдэхэ.
Тахал үбшэнһөө боложо, үнгэрһэн жэлдэ хэмжээ ябуулга эмхидхэгдээгүй гэжэ һануулнабди. Байгша ондо эпидемиологиин бүхы эрилтэнүүдые сахин, хэмжээ ябуулга үнгэргэгдэхэ болоно.
Театрай үдэр тэмдэглэхэ ёһололдо Х.Намсараевай нэрэмжэтэ Буряад драмын, Н. Бестужевай нэрэмжэтэ Ород драмын, Г. Цыдынжаповай нэрэмжэтэ Буряадай оперо болон баледэй, хүүхэлдэйн «Үльгэр» болон Залуушуулай уран һайханай театрнууд хабаадаха.
«Байгша ондо илагшад 9 номинацида элирүүлэгдэхэ: эрэ хүнэй эрхим роль, эхэнэрэй эрхим роль, оперын болон баледэй эрхим парти болон бусад. Тиихэдэ театр бүхэн номер бэлдэжэ, капустнигай мүрысөөндэ хабаадаха. Тэдэнэй эрхим харагшадай һанал хуряалгаар элирүүлэгдэхэ», - гэжэ Буряад Уласай соёлой сайд Соелма Дагаева хэлэбэ.
