Энэ жэлэй хэмжээн Барагханай арадай театрай анхан байгуулагдаһаар 85 жэлэй болон Гааргын арадай театрай 65 жэлэй ойн баярнуудта зорюулагдаа. Буряад Уласай Соёлой сайд Соёлма Дагаева театрнуудай зүжэгшэдые, ветерануудые энэ дэмбэрэлтэ ойн баярануудаар амаршалжа, саашадаа харагшадаа ходо баярлуулжа, халуун альга ташалгаар угтуулжа ябахыень хүсэбэ.
Фестивальда аймагай 6 бүлгэм хабаадажа, илангаяа буряад хэлэн дээрэ зүжэгүүд табигдажа, олоной сэгнэлтэдэ дурадхагдаа.
- Гран-При шанда Барагханай арадай театр хүртэбэ. «Сааза» гэжэ нэрлэгдэһэн зүжэгые Евгения Раднаева найруулжа бэлдээ.
- Нэгэдэхи шатын диплом Гааргын арадай театр абаа. Эдэнэр «Эрьехэ наран» гэһэн зүжэг харуулаа.
- Хоёрдохи шатын дипломдо «Һэшхэлэй тэнсүүри» гэжэ спектакль харуулһан Дэрэнэй арадай театр хүртөө.
- Гурбадахи шатын диплом Хурамхаанай арадай театр абаа. «Шэмэруун сагай сууряан» зүжэг олоной сэдьхэл зүрхэ хүлгөөбэ.
- «Эхэнэрэй эрхим роль» шанда Гааргын театрай Оюна Базарова, «Эрэшүүлэй эрхим роль» шанда Барагханай театрай Олег Дармаев гэгшэд хүртөө.
- «Дебют» номинацида Уланханай арадай театрай зүжэгшэн Валерия Бадмаева эрхимлээ.
«Театрай нуга» фестиваль шэнэ нэрэнүүдые, бэлигтэй, талаантай зүжэгшэдэй байһые тодоруулдаг.
Эдэ үдэрнүүдтэ Барагханай арадай театр Улаан-Үдэ хото гастрольдо гаража, А. Макаенкын «Трибунал» («Сааза») зүжэг харуулха. Апрелиин 29-дэ «Железнодорожник» гэһэн Соёлой Ордондо харагшадые хүлеэн байха гэжэ дуулгая.
