- Агын Буряадай тойрогто онсо өөрын шанартай, үеһөө үедэ дамжуулагдажа байдаг эдүүдые үйлэдбэрилхэ арга боломжо бии. Нютаг ороной тэмдэгүүд тухай хуули нёдондо хүсэндөө ороо, тэрэ өөрын эд наймаалхада дүнгэлтэ болохо, мүнгэ татаха болон аяншалга хүгжөөлгэдэ нүлөөлхэ байна. Саашадаашье Агада хэгдэһэн эд эрхим гэһэн тэмдэгтэй болгохо ажал үргэлжэлхэ, - гээд Агын Буряадай тойрогой Захиргаанай хүтэлбэрилэгшэ Буянто Батомункуев хэлэбэ.
Үндэһэн дэгэл ба тойробшо малгай хоёрые нютаг ороной эрхим эд гэһэн тэмдэгтэй болгохоор баримтата саарһыень хизаарай буряад соёл хүгжөөлгын түб бэлдэһэн байна.
- Агын буряадуудай заншалта хубсаһанай онсо илгаа, шанар шэнжыень тодорхойлһон саарһа бэлдэхын тула шэнжэлэлгын ехэ ажал хэгдээ, - гээд түбэй захирал Сэсэг Норполова мэдээсээ.
Заншалта хубсаһан, хониной нооһоор, адуунай дэлһээр болон мүнгөөр хэһэн эд, хүүхэлдэйнүүд ба бэшэшье гарай бэлэгүүд, үндэһэн хоол болон эд бараан – бултал энэ нютаг орондо заншаһан аргаар бүтээгдэһэн байхадаа, онсо эд болоно бшуу.
