Энэ үдэшэ Ленинградай Гүрэнэй театрай, хүгжэмэй болон кинематографиин дээдэ һургуулиие Буряад оронһоо сугларһан хоёрдохи студиин дүүргэжэ гараһаар 50 жэлэй ойн баярта зорюулагдаһан хэмжээ ябуулгануудай гаршаг доро эмхидхэгдээ. Чингис Цыреновичнай аяар тэрэ 1969 ондо зүжэгшэнэй дээдэ һургуулиие Нева мүрэнэй эрьедэ 15 хүбүүд басагадай тоодо түгэсхөөд, нютагаа бусажа, зохёохы ажалайнгаа замые Буряад театртаа эхилһэн намтартай.
Чингис Гуруев хэбэд номхон Хэжэнгын аймагай Хөөрхэ нютагта түрэһэн. Хоца Намсараевай нэрэмжэтэ Хэжэнгын дунда һургуули дүүргэһэнэй удаа, дээрэ нэрлэгдэһэн ороной эрхим һургуулинуудай нэгэндэ орожо һураха хубитай байгаа ха юм даа. Чингис Цыренович түрэл театрайнгаа тайзан дээрэ 100 гаран элдэб абаритай дүрэнүүдые байгуулжа, харагшадтаа бэлэглээ, мүнөөшье тайзан дээрээ.
Уран шүлэгшэ, зохёолшо Чингис Гуруев «Харгы» (1975), «Үндэр тэнгэри» (1985), «Үлзы хэшэг» (2003), «Хуһахан» (2005), «Амин гол» (2015), «Хэбэд номхон Хэжэнгэ» (2017) гэhэн шүлэгүүдэй номуудые хэблүүлэнхэй. Театртаа олон удаан жэлнүүд соо хүгжэмэй таһагые даажа байһан, Оросой Холбооной урлалай габьяата ажал ябуулагша, мэдээжэ хүгжэм найруулагша Владилен Пантаевтай хамта зохёоһон дуунуудынь үргэн Буряадтаа мэдээжэ болонхой.
1981 ондо тэрэнэй бэшэһэн «Алдуу» гэжэн зүжэг театрайнгаа тайзан дээрэ табигдаа бэлэй.
Чингис Гуруевай эрхим зохёолнууд һурагшадай уншаха хрестомати болон һуралсалай номуудта оруулагданхай. 2011 ондо «Бэлиг» гэһэн хэблэлдэ «Найдал» гэжэ рассказуудайнь согсолбори гараһан юм.
Уран зохёол бэшэхынгээ хажуугаар Чингис Цыренович монгол хэлэнһээ оршуулгануудые хэдэг. Балжиннямын Пүрэвдоржын «Даяаншын хашалан» (2015), Ринченэй Чойномой «Туужануудые» оршуулжа, ном болгожо хэблүүлһэн юм.
Чингис Гуруев Оросой Холбоото Уласай Уран зохёолшодой холбооной гэшүүн, эрдэмэй болон соёл урлалай Петровско академиин гэшүүн-корреспондент, Оросой Холбоото Уласай Сэтгүүлшэдэй холбооной гэшүүн, Оросой Холбоото Уласай театрай хүдэлмэрилэгшэдэй холбооной гэшүүн юм.
П. И. Чайковскийн нэрэмжэтэ дунда мэргэжэлэй хүгжэмэй һургуулида Чингис Цыренович багшалжа, оюутадтай дүй дүршэлөөрөө хубаалдажа, сэнтэй һургаал заабаринуудаа үгэжэ байһан юм.
Чингис Цыреновичэй уянгата шүлэгүүд уншагдаа, шүлэгэйнь аялгаар найруулагдаһан, бүхы Буряадтамнай мэдээжэ болоһон ирагуу дуунууд зэдэлээ, зүжэгүүдһээ хэһэгүүд харуулагдаа. Тиигэжэ үдэшын туршада Буряад театр соо зохёохы ульһатай, аргагүй дулаахан оршон тогтожо, дэмбэрэлтэ ехэ удхатай зохёолнууд тайзан дээрэ байгуулагдажа, зүжэгшэдшье, харагшадшье баярлаа гээшэ.
П. И. Чайковскийн нэрэмжэтэ дунда мэргэжэлэй урлалай һургуулиин «Ликование» гэжэ оюутадай шуулга энэ үдэшые хатарнуудаараа шэмэглээ. Нацагдоржийн Нямдоржын хүтэлбэрилдэг моринхууршадай шуулга баһал онсо һайхан нэмэри боложо оролсоо.
Чингис Цыреновичэй зээнсэр болохо эдир хүгжэм найруулагша, дуушан Лүдэб Очиров «Эхэ нютаг Хөөрхэмни» гэжэ шэнэ дуугаа Чингис нагасынгаа, харагшадай һонорто бэлэглээ. Энэ дуунай үгэнүүдые Чингис Гуруев бэшээ гэжэ тухайлмаар ха юм даа.
Тоглолтын эсэстэ Чингис Гуруевэй олон тоото түрэл гаралынь, нютагаархидынь, үетэн нүхэдынь тайзан дээрэ гаража, баглаа сэсэгүүдые, гарай бэлэгүүдые барижа, баяр баясхаланаа мэдүүлээ.
Бэшэхэ үшөө мүрнүүдтнэй
Булагаар халижа сүршэг лэ!
Бэлигээр халиһан сэдьхэлтнэй
Баяраар бурьялжа бадараг лэ! –
гэһэн үреэлэй дээжын үгэнүүд хэлэгдэжэ, тэдэ һайхан амаршалгануудай урма баяр, захяа Чингис Цыреновичэймнай саашанхи харгыда, зохёохы намтартань шэнгэхэ болтогой гэжэ дохин үреэнэбди!
