Аглаг һайхан Ага нютагта Буряадай уласхоорондын «Алтаргана» нааданда арадайнгаа заншалнуудые сахиха, хүгжөөхэ, уран һайханай бүлгэмүүдэй гүйсэдхэлгын ургалтые һайжаруулха, урмашуулха зорилготой «Буряад хүнэй нэгэ үдэр» гэһэн урилдаанда Монгол оронһоо, Буряад Уласһаа, Эрхүү можоһоо, Үбэр Байгалай хизаарһаа 8 бүлгэмүүд, дүн хамтадаа 150 хүн хабаадаа.
Бүлгэмүүд 20-һоо олон бэшэ гэшүүдһээ бүридэхэ, нэгэ үхибүүн лэ хабаадаха аргатай байгаа. 20 минутаһаа үлүү бэшэ саг соо залуушуулай наадануудай, арадай һайндэрнүүдэй, гэр бүлын ёһо гуримуудай хэһэгүүдые нютагай аман зохёолой онсо илгаа баримталан харуулха эрилтэнүүд хабаадагшадта табигдаа.
Дорнод аймагай «Үлзын долгин» бүлгэм «Сэргэ бодхоохо» заншалаа харуулхадаа, эсэгын хуһан модон сэргэ хүбүүнэй сэргэ хоёрой илгаа тайлбарилаа, сэргэ һуулгахадаа, арбай таряанай зүйл, мүнгэ, хадаг доронь нюугаад, дууладаг дуу, хэлсэдэг үреэлнүүдыень дурадхаа.
Эрхүү можын «Талын дуун» бүлгэм «Хүбүүгээ мориндо һуулгаха ёһо» ямархан бэ гэжэ ойлгуулаа. Долоо хүрэһэн хүбүүндээ хүгшэн эжынь дэгэл оёжо, зүүн гарһаа түрүүн үмдүүлхэ , тобшолходоо дороһоонь захалха гэжэ заана. Хүгшэн абань эрын ёһоор бүһэ хутагыень зүүлгэхэдээ, гамнажа ябахые захина. Түрэл гаралынь һахюуһан боложо, наһан соонь хажуудань харалта ябаха номо годли бэлэглэнэ.
Үбэр Байгалай хизаарай «Тоонто» бүлгэмэйхид «Тушаа таһалха» заншалда нарин гэдэһээр бүтээһэн тушаа үхибүүнэйнгээ хүл доро табихадаа, саашадаа жаргалтай, гэдэһэ садхалан гэһэн удхыень тайлбарилаа. Нагаса абань мүнгэн хайшаар тушаа таһалхадаа, алхам бүхэндөө амжалта туйлажа, аза талаантай ябахые үреэнэ.
Буряад Уласай арадай аман зохёолой «Эхын буян» бүлгэм үндэһэн арадайнгаа хүгжэмэй зэбсэгүүдые хэрэглэжэ, эрхим һайнаар зүжэглэмэл «Заяаша үльгэршэн» гэһэн наадаяа табихадаа, дээдэ тэнгэриһээ талаантай, үргэмжэтэй, орон нютагһаа харасатай, хүндэтэй үльгэршэнөө хадата Захааминай арад зон агнуурида гарахын урда тээ залажа, үльгэр түүрээлгэдэг, үбшэн тулиһан зондо ехэ туһатай, эмшэлхэ, аргалха шэдитэй гэжэ этигэдэг, мүргэдэг байһан гэжэ харуулаа.
Үбэр Байгалай хизаарай «Сахюурхан» бүлгэм «Басаганай энжэ барюулга» гэһэн ёһо харуулаа. Худанар бэриеэ гэртэнь бэлэг сэлэгтэй, хэшэгтэй айлшалуулжа, эжы абаяа хүндэлдэг заншал сахюулжа, энжыень тогтоожо абана.
Хэнтэйн аймаг «Үүрэй толон» бүлэг «Урагай баяр» зүжэгтөө элинсэг, хулинсагнай уг гарбалаа мэдэхые заадаг байһан, ургажа байһан модон хэдэн аса һалаа боложо һалбардаг, угай бэшэг нютаг бүхэндэ дамжуулхые оролдодог гэжэ ойл- гуулна.
Улаан-Баатарай “Улаалзай” бүлгэм хүн омог нэрээрээ илгарха, мал тамгаараа илгарха гэдэ- гээр «Мори тамгалха» ёһо олоной һонорто дурадхахадаа, түрүүн тамгаа утажа, арюулжа, тулгадаа ха- лаагаад, хамагай түрүүн сохо сагаан хээрэ унагаяа асаржа, һайхан үреэл табижа, найр наада үнгэргэдэг байһаниинь дурадхаа..
Усть- Ордагай “Анга” бүлгэм “Далайн эжэндэ” мүргэхэ дурдалгануудые, Байгал далайдаа мэндэшэлхэ ёһо, Байгал далайн хаб загаһанай арһаар оёһон хубсаһа, гүльмэ гүрэхые харуулаа, Байгал далай тухай олон дуу бэлэглээ.
Гран- При шан Үбэр Байгалай хизаарай «Сахюурхан» (Лхама Цыденешеевна Балданова) абаа.
