Дүрбэн жэлэй туршада хүлеэгдэһэн «Алтаргана-2020» нааданай шүлэгэй мүрысөөнэй лауреат болоhон, Монгол Уласай Хэнтэйн аймаг түлөөлһэн хабаадагша Зоригбаатарай Чинзоригтой уулзажа, мүрысөөн тухай, Хэнтэйн аймаг, Батширээт нютаг тухайнь хөөрэлдэһэн байнабди.
Хэнтэйн аймагай Батширээт һомон. Гэр бүлын архивай фото-зурагууд.
- Чинзориг, «Алтаргана» нааданай шүлэгэй мүрысөөндэ «Би буряадби» гэһэн удха түгэлдэр шүлэгөө олон харагшадай, шагнагшадай үзэмжэдэ табиһан байнат. Хэзээ түрүүшынгээ шүлэг зохёожо туршаһамта?
- Үшөө арба наһатай ябаад, багша тухайгаа түрүүшын шүлэг найруулһан байнаб. Шүлэгэй мүрысөөндэ уншаһан «Би буряадби» гэһэн шүлэгөө 2019 ондо бэшээ hэм. Буряадууд хэһээлтэдэ орожо, ехэ зобоһон, зүдэрһэн гэжэ түүхэһээ мэдэнэбди. Буряад зоноо хайрлажа ябадагби, тиигээд лэ энэ шүлэг түрөөл даа.
- Шүлэг зохёохо шунал хаанаһааб? Аба эжытнай зохёодог гү?
- Аба эжымни шүлэг бэшэдэггүй. Абамни бурханай орондо заларһан, эжымни мүнгэн hангай һалбарида ажаллаад, наһанай амаралтада гараhан юм.
- «Алтаргана» ехэ нааданда хэдыдэхеэ хабаадабабта? Танай һанамжаар, Ага нютаг ямар байнаб?
- «Алтарганада» түрүүшынхеэ хабаадабаб. Монголhоо Булган аймагай Сэрмаа шүлэгшэнтэй хоюулаа хабаадаабди. Би шүлэгэй мүрысөөнэй хажуугаар үшөө богони зохёолнуудай мүрысөөндэ талаан туршаха һанаатай байгааб. Теэд зэргэ болоходонь үрдеэгүйб. Ага нютаг түрүүшынхеэ ерэгдэбэ. Ага һайхан нютаг байна даа, олон хүнүүдтэй танилсааб, хожом дахинаа Ага ерэхэ хүсэл түрэнэ, хэзээ нэгэтэ Ага нютагта зорюулжа, шүлэг зохёохоб.
- Шүлэгэй мүрысөөндэ арбан минутын туршада шүлэг бэшэхэ даабари үгтөө. Ямар сэдэбээр бэшэхэ гээб? Хэсүү байгаа гү?
- Шүүгшэд «Уянгын жэгүүр» гэһэн сэдэбээр шүлэг бэшэхэ гээ. Шүлэг бэшэхэдэ, хэсүү байгаагүй, юундэб гэхэдэ минии багша, Монголой соёлой габьяата хүдэлмэрилэгшэ Ломбын Нямаа, 5 минутын туршада шүлэгүүдые олоор бэшүүлдэг байhан.
- Юун тухай бэшэхэ дуратайбта?
- Зохёоһон бүтээлнүүд соомни дуран тухай шүлэг байхагүй, ондоо сэдэбээр бэшэһэн байдагби, харин дуран, хайра сэдьхэл тухай бэшэхэл байхаб. Досооһоом гараhан һанал бодолоо сэдьхэлээ хүлгөөн бэшэдэгби.
