Үнгэрэгшэ долоон хоногто И. Калашниковай нэрэмжэтэ хотын номой санда «Минии Буряад» («Моя Бурятия») гэһэн түсэлэй гаршаг доро Ород Уласай габьяата зүжэгшэн Дарима Базаржаповна Сангажаповатай уулзалга дулаахан оршон байдалда боложо үнгэрөө.
Ульһа дулаан уулзалгада Ойн ажахын, Байгалай аяншалгын колледжын оюутад болон 29-дэхи Буряад гимназиин һурагшад хабаадалсахадаа, мэдээжэ зүжэгшэнэй намтартай, зохёохы ажалтайнь дүтөөр танилсабад. Энэ хэмжээ ябуулга Буряад Уласай байгуулагдаһаар 100 жэлэй ойн баярта зорюулагдаһан түсэл болоно. Үшөө тиихэдэ январиин 21-дэ тэмдэглэгдэдэг үндэһэн арадуудай түрэл хэлэнэй һайндэртэ дашарамдуулагдаба.
Дулаан оршондо
Улаан-Үдэ хотын номой санда иимэ уулзалганууд саг үргэлжэ боложо байдаг юм. Мэдээжэ зүжэгшэд, дуушад, хатаршад, мүн уран зохёолшод, ирагуу найрагшад залуу һүрэг үетэнтэй нюур нюураараа харалсажа хөөрэлдэдэг заншалтай. Оюутад, һурагшад нютагайнгаа түрүү зоной наһанайнь намтар, зохёохы ажалтайнь өөрһөөнь асуужа, дүтөөр танилсана, һонирхоһон асуудалнуудаа табижа, тодо харюу абана. Энэ түсэлдэ зорюута урилгаар хүрэжэ ерэһэн хүгжэмшэд өөрынгөө зэмсэг дээрэ наадажа, тааруу зохид оршон тогтооно.
Хүүгэдэй хүгжэмэй 5-дахи һургуулиин багша Лариса Фёдорова скрипкэ дээрэ наадаба, харин «Байгал» театрай хүгжэмшэн Эрдэм Дымбрылов морин хуурай хүбшэргэй татажа, аялгата хүгжэм зэдэлүүлбэ. Тиихэдэнь энэ номой сангай мэргэжэлтэн, түсэл эрхилэгшэ Маргарита Баторова ерэһэн айлшадые мэдээжэ зүжэгшэнэй намтартай дүтөөр танилсуулаа.
- Шэнэ жэлдэ түсэлэймнай түрүүшын хэмжээ ябуулга боложо байна. Үнгэрэгшэ жэлэй һүүл багаар Буряадаймнай суута балерина, багша Лариса Протасова, тиихэдэ Молодёжный театр байгуулһан Анатолий Баскаков гэгшэд манай айлшад болоһон байна. Түрэл Буряад Уласайнгаа тэбхэр ойн баярта зорюулжа, иимэ түсэл зохёон байгуулаабди. Ургажа, үндыжэ байһан үхибүүднай нютагайнгаа мэдээжэ зонтой танилсажа байхадань, хэды һайн гээшэб даа, - гэжэ Исай Калашниковай нэрэмжэтэ номой сангай мэргэжэлтэн Маргарита Павловна хэлэнэ.
Дүтөөр танилсаба
Х. Намсараевай нэрэмжэтэ Буряадай гүрэнэй академическэ театрай бэлиг түгэлдэр аха үеын зүжэгшэдэй нэгэн Дарима Базаржаповна согтой залитай залуу наһан, оюутан ябаһан хаһаяа, ажалайнгаа намтарай эхин тухай сугларагшадта хөөрэбэ. Номой сангай мэргэжэлтэдэй суглуулһан видео-буулгабаринууд дээрэ зүжэгшэнэй наадаһан дүрэнүүд харуулагдаа. Тэрэниие тодорхойгоор зүжэгшэн хөөрэжэ үгэхэһөө гадна, зүжэгэй хэһэгүүдые уншажа үгэһэн байна. Аяар 50 гаран жэлэй саада тээ алдар суута Ленинград хотодо зүжэгшэнэй мэргэжэлдэ алдарта ЛГИТМИК-тэ һураһан үе сагаа һанаандаа эрьюулэн, мүнөөнэй оюутадта хөөрэбэ.
- 1964 ондо Буряад драмын 2-дохи студиин бүлэгтэ орожо, домог суута Ленинград хотодо һураха аза талаантай байгааб. Залуухан, гүлмэрхэн бидэнэй тэндэ һураһан саг одоол жаргалтай хаһа һэн даа. Долоон хоногой нэгэ дахин заатагүй театр ошожо, талаан бэлигтэй зүжэгшэдэй наада хаража, сэдьхэлээ ханаахаш, дүршэл шадабарииень һонирхон байжа анхархаш. Мэргэжэлэй эхиндэ байһан ерээдүйн зүжэгшэд болохо бидэ мэдээжэ Товстоноговой нэрэмжэтэ театрай ододые хаража бахархадаг байгаабди. Таанад түрэл Буряад театртаа ерэжэ, зүжэгүүдые хаража байгты, эхэ буряад хэлэеэ үзэгты, шудалагты, - гэжэ Дарима Базаржаповна залуушуулда хэлэбэ.
Дүршэл ехэтэй зүжэгшэн
Дарима Базаржаповна Сангажаповае Буряад орондо, Монголдо, мүн гадууршье олон зон таниха, мэдэхэ. Илангаяа аха үеын харагшадта тон мэдээжэ юм. Дүршэл ехэтэй зүжэгшэн 1969 онһоо эхилжэ, түрэл болоһон театртаа алба хаажа эхилээд, мүнөөшье тэндээ хүдэлһөөр. Ленинград хотодо һургуули үзэжэ ерэһэн 2-дохи буряад студиинхидые одото бүлэг гэжэ нэрлэдэгынь дэмы бэшэ. Дарима Сангажапова, Людмила Дугарова, Михаил Елбонов, Майдари Жапхандаев болон бусад зүжэгшэд түрэл арадайнгаа нэрэ үндэр дээрэ үргэжэ ябаа, ябанашье. Театрай тайзанай одон боложо яларһан зүжэгшэдэй дунда Дарима Базаржаповна өөрын онсо һуури эзэлдэг юм. Үнгэрһэн 50 гаран жэлэй туршада бэлигтэй зүжэгшэн 100 гаран дүрэ шадамар бэрхээр бэелүүлжэ, харагшадайнгаа зүрхэ сэдьхэл хүдэлгэжэ шадаһан байха. Театрай тайзан дээрэ наадахаһаа гадна, тэрэ 1976 ондо Ленфильмын буулгаһан «След росомахи» гэһэн уран һайханай кинодо Долина Андреевагай дүрэ бэелүүлһэн юм.
- Ялас гэмэ зүжэгшэн байхынгаа хажуугаар Дарима Базаржаповна шадамар бэрхэ багша, өөрын зохёон байгуулһан онол аргануудые бүридхэһэн номой автор, Засагай газарай хүдэлмэри өөр дээрээ үзэһэн хүн гээшэ. Аяар 10-аад жэлэй туршада Буряадай Соёлой яаманда хүдэлжэ гараһан юм, - гэжэ үдэшые хүтэлэгшэ Маргарита Баторова олондо хэлэбэ.
Саашадаа иимэ удха түгэлдэр уулзалганууд үшөөшье эмхидхэгдэжэ, оюутад болон һурагшад нютагайнгаа мэдээжэ зонтой танилсажа байг лэ даа.
