Александр Островскиин «Лес» (Ой – бур.; наһанай хизаарлалта: 16+)
Бато Багдаевай тэмдэглэһээр, зүжэг хараха гэжэ ерэһэн зониие голхоруулхагүйн тула найруулагша өөрөө тайзан дээрэ гараха гэжэ шиидээ. Угайдхадаа бүхы зохёолыень сээжэлдэжэрхиһэн байгаа бшуу. Найруулан табиһан ушарһаа зүжэгшэдэйнгээ хүдэлсэ бүхэниие мэдэһэниинь гайхалгүй.
Найруулагшын тайзан дээрэ гарахада, харагшад гайхаа гэлыгээшье һаа, ехэ дулааханаар тэрэниие угтаа. Бато Багдаевай һанамжаар, Олег Юмов ялас гэмээр дүрэеэ бэелүүлжэ, сугларагшадые баясуулаа.
«Ой» гэжэ зүжэг Александр Островскиин түрэһөөр 200 жэлэй ойдо зорюулагдан табигдаа. Энэ ой 2023 ондо тэмдэглэгдэнэ. Зүжэгэй премьерэ 2022 оной декабрь һарада болоһон юм.
