Декабриин 26-һаа захалжа, хүүгэдэй үбэлэй амаралтын үедэ, тэдээндэ Шэнэ жэлэй бэлэг болгожо, Хоца Намсараевай нэрэмжэтэ Буряад драмын академическэ театр жэл бүри шэнэ зүжэг – үльгэр, онтохо табижа байдаг заншалтай. Энэ олон жэлнүүдэй туршада иигээд лэ ябажа байдаг.
Шэнэ, 2012 ониие угтуулан, эдир харагшадтаа гэжэ залуу драматург Болот Ширибазаровай бэшэһэн «Элинсэгүүдэй шэдитэ орон» («Волшебная страна предков») гэжэ онтохо табиһан байгаабди. Энээхэн зүжэгые аха наһатан, бүдүүн хүнүүд лэ ойлгохо байха, тиимэ оюун ухаанай гүнзэгы руу орошоһон орёошогхон удхатай зүжэгые хүүгэд ойлгоншьегүй байхадаа болохо гэһэн бодол театрайхидай урда гарабашье, уран зохёолшын бодолнуудые аха ангин һурагшадһаа болохо багашуулайшье ойлгожо байһан ушар гайхалтай байба.
Буряад Республикын искусствын габьяата ажал ябуулагша Баярма Жалцановагай найруулан табиһан энэ зүжэгые хүшэгын нээгдэхэһээ хаагдатарнь оройдоошье шэмээ шууяагүй, нэгэ амяар хүүгэдэй хаража гараһан ушарынь гайхал болоо. Хойтын юртэмсэ гээшын бии, үгы гэһэн ойлгосо эндэ гол һуури эзэлээ бэшэ, харин тэндэ боложо байһан ушаралнууд, хара, сагаан хүсэнүүдэй хоорондын тэмсэл – эдир харагшын эльгэ сэдьхэл эзэлһэн энэл ха юм даа. Хэншье һаа, бишыхан байхадаа, эгээл һайн һайханай түлөө тэмсэжэ байһан хүсэнүүдые «манайхин» гэжэ баяртайгаар дэмжэдэг байһанаа һанана ёһотой, эгээл тиимээр сагаан хүсэнүүдэй эсэсэй эсэстэ илажа гарахада театраар дүүрэн хүүгэдэй ошоор бадарһан нюдэнүүд, нэрьемэ альга ташалган – энэл даа Буряад театраймнай үшөө нэгэ амжалта.
Тайзан уран гоёор шэмэглэһэн В. Васильева, хубсаһа зохёожо зураһан Е. Демидова, хатарнуудые найруулһан Е. Герасимова, зүжэгэй хүгжэмые найруулан бэшэһэн Саран-Туяа Жалцанова – эдэл даа манай бишыхан харагшадта Шэнэ жэлэй баяр наада бэлэглэһэн хүнүүднай!
