Угсаата арадайнгаа урданай дуунуудые үндэр наһатай зонһоо бэшэжэ абаад, суглуулаад шэнэ дуунай диск Москвада бүтээгдээ. үнгэрэгшэ жэл Россиин Федерациин соёлой габьяата хүдэлмэрилэгшэд Саян Эржена Жамбаловтанай үүсхэлээр «Баруун буряадуудай дуунууд» гэһэн диск мүн лэ гараһан байна. Энэ удаа соёлой ажалябуулагшад Агын тойрогой, Монголой, Үбэр Монголой үндэр наһатайшуулдай уулзажа, зүүн буряадуудай урданай дуунуудые бэшэжэ абаад, хүдөө ажаһуугшадай өөһэдөө дуулаһан дуунуудые суглуулаад диск болгобо.
— Арба гаран жэлэй саана энэ ажал хэжэ эхилээ һэмди. Мүнөө эдэ дуунуудые дуулаһан зари дуушадынь наһа баранхай. Тиибэшье тэдэнэй дуулһан арадай дуунуудай аялга маягыень, нугалбарииень тэрэл зандань үлөөгөөд, урдандаа ямараар дууладаг байһыень харуулха, зондоо шагнуулха хүсэлтэйбди, — гээд мэдээжэ соёлой ажалябуулагша Саян Цыдыпович Жамбалов хөөрэнэ.
Аман зохёолой абдартай танилсаха үедөө зохёохы бүлэг ёһотойл арадай дуушадтай танилсаа, тэдэнээ хөөрөө ехэ һонирхожо шагнаа, һанаандаа хадуужа абаа болоно.
— 2000 ондо Дашбалбар сомондо Болот ахатай уулзахадамнай, ахатан гансашье урданай дуунуудые маанадта дуулаа бэшэ, мүн буряад арадай түүхын хуудаһануудые һонирхолтойгоор хөөрөө. Монголой буряадта хэлмэгдэлэй гэхэ гү, хашалган хамалганай үедэ дууладаг дуунууд олон байна. Тэрэ сагай шэрүүн байдалда ехээр сохюулагдаһан гэжэ эли, сэдьхэлдээ хадуугдамаар үндэр наһатайшуул дурсаа бэлэй. Шэнэхээндэ Нашан ахай гэжэ дуушан «Уусын дуунай» 22 бадаг дуулаа бэлэй. Тэрэнь энэ диск соомнай булта ороо, 12 минута соо зэдэлнэ. Шэнхээндэ, Агада Бальжан хатан тухай урдандаа олоор дууладаг байгаа ха. Тэрэ дуунуудынь мүнөө мартагдажа байна. Гадна 50-60 –аад оноор түүхын дуунууд, жэшээлбэл, Хориин Ринчин Доржи тайшаагай дуун, Хитадай хилэ дээрэ дуулаһан «Шэлдээ Занги» болон дуунууд хорюултай байгаа, — гээд Саян Жамбалов арадай дуунуудые бэшэхэдээ, шэнжэлэлгын талаар тодо элирүүлэгдээгүй олон үйлэ ушарнуудтай танилсаһанаа тэмдэглэнэ.
Үнэхөөрөөл, арадаймнай дуунууд соо манай гүн ухаан, манай сэдьхэл, түүхэ, тиимэһээ энэ баялигаа сэгнэхэл хэрэгтэй. Байгша оной февралиин 14-15-най үдэрнүүдтэ Буряадай гүрэнэй филармони соо «Зүүн буряадуудай зуун дуун» гэһэн дисктэй танилсалга болохо, энэ шэнэ бүтээл соо ороһон дуунуудые «Урагшаа» театр студиин дуушад гүйсэдхэхэ юм.
