“Тиимэһээ энэмнай, нэн түрүүн, үргэн дэлисэтэй телепроект гээшэ”, — гээд, тус хэмжээ ябуулгын эмхидхэлэй хорооной гэшүүн Норжима Цыбикова тэмдэглэхэ зуураа, Буряад орондо бэлэдхэлэй ажалай ябуулагдажа эхилһэн тухайнь дуулгаба.
“Ариг Ус” телекомпаниин байгуулагдаһаар 20 жэлэй ойдо зорюулжа, “Мүнгэн сэргэ” гэһэн буряад дуу гүйсэдхэгшэдэй мүрысөөн соносхогдоо. Тэрээндэ арадай дуушадһаа гадна, эстрадынш түлөөлэгшэд хабаадаха эрхэтэй. 14-тэй болотор хүүгэд, мүн 15-тайһаа дээшэ наһатай бүдүүн хүнүүд тус тустаа бэлиг талаангаа туршаха болоно. Шэлэн абалгын шата февралиин 16-да 11 сагта Улаан-Үдын Димитровой гудамжаар 2-дохи гэртэ байрлаһан Залуушуулай уран һайханай театрта эмхидхэгдэхэ.
“Харин финалынь мартын 19-20-до Буряад драмын театрта үнгэрхэ, — гэжэ Норжима Цыбикова дуулгахатайгаа хамта — тэндэл эрхимлэжэ гараһан дуушад Улаан-Баатарта Буряад ороноо түлөөлхэ”, — гэжэ мэдүүлнэ.
Хоёр жэлэй урда тээ Улаан-Баатарта түрүүшынхиеэ эмхидхэгдэһэн Монгол үндэһэтэнэй дуунай ехэ нааданда Монголой, Үбэр-Монголой, мүн манай Буряадай дуушад оролсоо бэлэй. Арадай дуу гүйсэдхэдэг залуу дуушад Саян Цымпилов, Рыгжидма Лудупова, Цыден-Еши Бимбаев, Сэсэгма Дондокова гэгшэд, мүн эстрадын дуушад Сэсэг Аюшеева, Тимур Болотов, “Урагшаа” бүлгэм яһала урагшатайгаар хабаадаа һэн. Тус хэмжээ ябуулга “Ариг Ус” телеканалай агаарай догиндо гарахын хажуугаар, Монголой Үндэсний телевиденеэр хүршэ гүрэнэй бүхы 21 аймагаар дамжуулагдаа һэн. Гадна Үбэр-Монголой “Одон” телевидениин хүсөөр бүхы дэлхэйгээр гэхээр харуулагдаа бэлэй. Харин байгша ондо үнгэрхэ фестиваль бүришье үргэн дэлисэтэй байхань, юуб гэхэдэ үшөө Хальмагай, Тувагай түлөөлэгшэд хабаадахань бшуу.
“Мүнгэн сэргэ” мүрысөөндэ хабаадаха хүсэлтэй һаа, 8(301-2)21-64-40 гэһэн номероор хонходожо гү, али arigus-tv.ru гэһэн интернет-хаягаар орожо, энэ тэрэ асуудал лаблажа болоно.
