Дашарабдан Одбоевич мэндэ ябахадаа театрһаа гараад лэ, тэндэһээ холо бэшэ, Ленинэй гудамжада, мүнөө байһан байгаалиин музейн баруун тээ һууха дуратай байһан юм гээд Буряад театрайхид дурсадаг. Тиигэжэ тэрээхэн хүшөөгөө тэрэл һуудаг газартань һуулгабал зохид байгаа гэһэн асуудалтай хотын захиргаанда хандаһан байгаа. Энэ хэрэгые эхинһээнь ударидажа байһан Россиин искусствын габьяата ажал ябуулагша, Буряад драмын театрай уранһайханай хүтэлбэрилэгшэ С. Д. Бальжанов хотын захиргаанай толгойлогшо Г. А. Айдаевтай энэ асуудалаар уулзажа, шэлэһэн тэрэ газараа дурадхахадань, Геннадий Архипович тон дуратайгаар зүбшөөлөө үгэһэн байна.
Тиигэжэ хэдэн арбаад жэлнүүдэй үнгэрһэн хойно Дашарабдан Одбоевичтай нэгэнтэ бэшэ али олон асудалнуудаар арсалдажашье, үгышье һаа «үдэрэй талаандашье» дашууржа һуудаг газартаа дахинаа нүхэрөө хараха арга олохон лэ хүнүүдтэ олодохонь гээшэ. Тэрниие мэндэ ябахадань оройдоошье хараагүй залуу һүрэгтэ баян түүхэтэй буряад арадаймнай эрхим хүбүүдэй нэгэн, дайнай үеын лётчик, уран зохёолшо Дашарабдан Батожабай үльгэр жэшээ боложо һууг лэ, домог зугаанииньшье дэлгэржэ байг лэ – энэнь һургаалайл нангин үүргэ байха.
Мэдээжэ скульптор Зандан Дугаров тус хүшөө уралан зохёожо байна.
Хүндэтэ нүхэд, Дашарабдан Одбоевичай нютагайхид, тус хүшөө бодхоохо хэрэгтэ мүнгэ суглуулха зорилготой Буряад драмын театрай 2012 оной мартын 23-да үнгэрхэ концерт-марафондо эдэбхитэй хабаадаял гэжэ уряалнабди!
