Февралиин 16-да болоһон шэлэн абалгада Захааминай, Ахын, Ивалгын, Хэжэнгын, Баргажанай, Хурамхаанай, Бэшүүрэй, Яруунын, Сэлэнгын, Загарайн аймагуудай, мүн Улаан-Үдэ хотын түлөөлэгшэд хабаадаһан байна. Эгээл үндэр наһатайнь – 73-тай, харин эгээл эдирхэниинь – һаял 7-той болоһон. Тэдээнэй дунда хүдөө ажахыдашье, түмэр харгыдашье хүдэлдэг хүнүүд, мүн хүүгэдэй сэсэрлигтэ ябадаг, дунда болон дээдэшье һургуулида һурадаг залуушуул, наһанайнгаа амаралтада гараһан ахамадшье үеын зон бии.
Жюриин гэшүүдэй тэмдэглэһээр, хүдөөһөө ерэһэн үбгэд хүгшэд, мүн БГУ-да болон ВСГУТУ-да һуража байһан оюутад ехээр баясуулаа. Дуунай мэргэжэл огто шудалаагүй аад, байгаалиһаал үгтэһэн бэлигэйнгээ ашаар тэдэнэр соёлой академидэ гү, али хүгжэмэй училищида тусгаар һуралсал гаража байһан залуушуултай нэгэ зэргэдэ, заримдаа үлүүгээршье дуулажа байна гээд, жюри онсолбо.
“Мүнгэн сэргэ” мүрысөөн үнэндөө Монгол үндэһэтэнэй дуунай ехэ нааданай шэлэн абалгын шата болоно. 2012 оной зун Улаанбаатарта болохо ехэ нааданда бэлэдхэл эршэмтэйгээр ябуулагдажа байнхай. Монголой 21 аймагта шэлэн абалга үнгэрөө. Дүн хамтадаа 300 гаран дуушад тэрээндэ хабаадажа, бэлиг талаангаа гэршэлээ гээд, энэ фестиваль эмхидхэгшэд - Монголой Үндэһэн телевидениин хүдэлмэрилэгшэд дуулгана.
Мүнөө дээрээ Монголой соёл урлал, илангаяа эстрада хурдан хүгжэлтэ туйлажа байһаниинь мэдээжэ. Тиимэһээ манай эндэхи дуушад тиишээ нюдөө табин байдагыньшье нюуса бэшэ. Гадна “Мүнгэн сэргэ” мүрысөөнэй ашаар Буряадаймнай бэлигтэн ганса Монголойш бэшэ, үшөө Үбэр-Монголой, Хальмагай, Тувагай – нэгэ үгөөр хэлэхэдэ, дэлхэйн монгол туургатанай түрүү түлөөлэгшэдтэй дүршэлөөрөө андалдаха, һайнииень халажа абаха, үнгэрхэдөө, өөһэдыгөө танюулха аргатай болоно ха юм. Энэнь лэ эгээл сэнтэй гэжэ һанагдана.
Мүн тиихэдэ Улаан-Үдэдэ болохо шэлэн абалгада Монголой Үндэһэн телевидениин сэтгүүлшэд хабаадаха, жюриин бүридэлдэ Монголой соёл урлалай мэдээжэ түлөөлэгшэд ажаллаха юм ха. “Мүнгэн сэргэдэ” хабаадагшад хоёр бүлэгтэ хубааржа мүрысэхэ. Тиихэдээ нэгэ бүлэгтэнь – арадай дуу, нүгөөдэдэнь – хэн нэгэнэй зохёоһон дуу гүйсэдхэгшэд орохо болоно. Бүлэг бүхэндэнь түрүүшын һуурида гараһан дуушаниие мэргэжэлтэ жюри элирүүлхэ. Харин Гран-При шанда хүртэхэ хүниие Буряадай засаг түрын, соёл урлалай, тамирай болон бусад һалбариин түлөөлэгшэдһөө бүридэһэн олониитын жюри һунгаха ёһотой. Илалта туйлаһан дуушанда “Ариг Ус” телекомпаниин зүгһөө мүнгэн шан, үнэтэ бэлэгүүд барюулагдана ааб даа. Харин онсолхо зүйл гэхэдэ, эгээл эрхим дуушанда мүрысөөнэй һүлдэ тэмдэг – морин хуурай статуэткэ сэбэр мүнгөөр шудхагдажа байнхай гээд, эмхидхэгшэд мэдүүлнэ.
Мартын 19-20-до Буряад драмын театрай тайзан дээрэ үнгэрхэ “Мүнгэн сэргэ” мүрысөөндэ Буряад ороной түлөөлэгшэдһөө гадна, Агын болон Усть-Ордагай бэлигтэн хабаадалсаха. Энэ тэрэ асуудалай гарабал, 21-64-40 гэһэн номероор лаблажа болоно.
