Мүнөө жэлэй мүрысөөндэ хабаадаһан эгээл бишыхан баатар Кирилл Очиров:
Үдэрэй амар мэндэ,
Хүндэтэ нүхэд,
Хүндэтэ шагнагшад!
Мүнөөдэрэй найраар бултыетнай
Амаршалаад, хэн, юун байһанаа
Хэды үгөөр хэлээд туршаһуу:
Би болобол хадаа,
Ерэн юһэн Тэнгэриин
Ерэн юһэн дархашуулай
Ураа хэдэг
Уран Дүшэ түшэлгэтэй,
Үндэр Баабай мүргэлтэй
Захын аймаг Захааминһаа
Олон дабаа дабажа,
Олон гол горхонуудые гаталжа,
Хүрэжэ ерээ хадаа
Хүхихэм даа, наадахам даа
Нүхэдэй байһанда.
Хүхихэм даа, дуулахам даа
Дуунуудай байһанда.
Шагнагты шадал соогоо,
Сэгнэгты сэдьхэл соогоо!
Жэл бүри Сагаан һарын түрүүшын үдэрнүүдтэ үнгэржэ байдаг заншалта мүрысөөнүүдэй нэгэн – баатар хүбүүдэй, дангина басагадай мүрысөөнүүд иигээд лэ эхилнэ бэлэй даа.
Һүүлэй жэлнүүдтэ тус мүрысөөнүүдэй дэлисэ үргэдэжэ, хабаадагшадайнгаа тоогоор жэлһээ жэлдэ олошоржол байһан хэбэртэй. Хабаадангүй яахаб теэ, иимэ хэмжээнэй, тэрэ мүртөө шагнал һайтай мүрысөөнэй байһанда. Урдандаа хүбүүднай «Гэсэр» боложо наададаг байтараа, хожомынь тэдэмнай «Баатарнууд» болошоо һэмнэй.
Улаан-Үдэ хотоһоо, республикын бүхы шахуу аймагуудһаа доро дороо үнгэрһэн мүрысөөнүүдтээ илажа гараһан хүбүүд, басагад Улаан-Үдэдэ февралиин 29, мартын 1-дэ шэлэн абалгын шатануудые дабажа, мартын 2-то Хоца Намсараевай нэрэмжэтэ театр соо үнгэрһэн түгэсхэлэй шатада хабаадажа, харагшадай, нютаг нютагаараа хубааран һанаагаа зобон һаналаа табяашадай, тэдээнһээнь үлүү ехээр зобоһон түрэлхидэй зүрхэ, сэдьхэлнүүдые һэгшээн үнгэрбэ гээшэ.
Мүнөө жэлэй наадануудта Улаан-Үдэ хотоһоо, тиихэдэ Ивалгын, Ахын, Захааминай, Хяагтын аймагуудһаа, Эрхүү можын Усть-Ордагай тойрогһоо илангаяа олон хабаадагшад байба гээд тэмдэглэгдээ, тиихэдээ арадайнгаа заншал, гуримуудые, буряад хэлэеэ тон мэдэхэ хүүгэд лэ иимэ хэмжээнэй мүрысөөнүүдтэ хабаадахаяа зүрхэлнэ ха юм даа, барандаа тон нарин бэлэдхэл, һорилгонуудые дабажа ехэ театрай тайзан дээрэ хүрэжэ ерэһэн зон ха юм.
Мүнөө жэлэй мүрысөөнүүдтэ хабаадалсаа гэбэл:
«Эдир дангина» – 36, «Эдир баатар» – 23, «Дангина» – 29, «Баатар» – 14 басагад хүбүүд шэлэн абалгын шатада хабаадажа, эсэслэн илажа гарагшад иигэжэ тодороо:
«Эдир баатар» – 8 наһатай ород яһанай Иван Кузнецов (Улаан-Үдэ)
«Эдир дангина» – 10 наһатай Валерия Банзарон (Ярууна)
«Баатар» – 25 наһатай Павел Цыремпилов (Хурамхаан)
«Дангина» – 17-той һоёд басаган Елена Аюшеева (Аха)
Бүхы дэлхэйн буряадуудай 2012 оной ехэ наадан «Алтаргана» ерэхэ зундаа Забайкалиин хизаарай Агын тойрогто үнгэрхэ шиидхэбэри абтанхай, ииһээр бэлэдхэлэй хүдэлмэринүүд эхилхэнь бэзэ. Сэбэрхэн басагадай харалган тэрэ наадануудай тоодо ородог, тэрэ харалгандань Елена Аюшеева республикаяа, «Баатар», «Дангинын» мүрысөөнүүдэй гуримуудай ёһоор, түлөөлхэ эрхэдэ хүртэбэ гээшэ.
Буряад Республикын соёлой министерство, республикын арадай уран бэлигтэнэй түб иигэжэ жэл бүри угсаата арадайнгаа ургажа ябаһан уран бэлигтэй һүрэгые элирүүлжэ, тэдээнэй хоорондын мүрысөөнэй аргаар дэмжэжэ, үргэжэ, саашанхи ажабайдалдань далижуулжа байдаг гэгээн сагаан дэмбэрэлтэй хэрэг үйлэдэжэ байнал даа, наһан үеэрээ тиимэл байхань болтогой!
