Мартын 19-20-ой үдэрнүүдтэ Улаан-Үдэдэ аялга дуунай ёһотой һайндэр болоо гэхэдэ алдуугүй. Арадай болон хэн нэгэнэй зохёоһон мүнөө үеыншье, үнинэй мэдээжэшье дуунуудые мүрысөөндэ хабаадагшад гүйсэдхэжэ, арад зониие хужарлуулаа. Теэд энэ һайндэр хоёр үдэрөөр хизаарлаагүй, тус мүрысөөн “Ариг Усай” агаарай долгиндо апрель һара соо гаража, теле-харагшадыешье баясуулха. Гадна Монголой үндэһэн телевиденеэр харуулагдаха.
5-дахи жэлээ “Ариг Ус” телеканалай агаарай долгиндо гаража байһан “Мүнгэн сэргэ” гэһэн буряад дамжуулгын уряа доро эмхидхэгдэһэн энэ мүрысөөндэ Буряадай, Усть-Ордагай болон Агын бэлигтэй бэрхэ дуушад хабаадалсаа. Мартын 19-дэ хамта дээрээ 36 хүн тайзан дээрэ гараа, тэдээнэй тэн хахадынь һагшагдажа, мартын 20-ой түгэсхэлэй шатада гараа. Тэндэ дуулаһан 18 дуушад сооһоо 4-иинь үхибүүд байжа, ами аминдаа шангай һууринуудые хубаагаа. Эдир жаахан Баясхалан Цыдыпов илалта туйлажа, Буряадай һуралсалай болон эрдэм ухаанай министерствын зүгһөө “Океан” гэһэн бүхэроссин хүүгэдэй түбтэ амарха путёвкодо хүртөө. Шангай удаадахи һууринуудта тус тустаа Ивалгын аймагай Һужаагай дунда һургуулиин һурагшад Намжил Найданов Аюр Улзытуев, мүн Хэжэнгын аймагһаа ерэһэн 7-тойхон Оюун-Эрдэни Дамбаева, үшөө Хурамхаанай аймагай эдир түлөөлэгшэ Александра Банзарова гэгшэд гараба, үнэтэ бэлэгүүдтэ хүртэбэ.
Ехэшүүлэй дунда арадай дуу дууладаг Марина Будаева (Хурамхаан) – 3-дахи һуурида, Гомбожаб (Шэнэхээн нютагай түлөөлэгшэ, хүгжэмэй колледжын оюутан)– 2-дохи һуурида, мүн Саян Цымпилов (Агаһаа гарбалтай, тус мүрысөөндэ Буряад орониие түлөөлөө, хүгжэмэй колледжын оюутан) – 1-дэхи һуурида гараа. Эндэ Санкт-Петербург хотын “Ая-ганга” гэһэн буряад бүлгэмэй зүгһөө тусхай шан – Санкт-Петербург хото ошохо путёвко Рыгжидма Лудуповада барюулагдаа.
“Эстрада” гэһэн номинацида 3-дахи һуурида хоёр хүн гараа: Дугарма Цыренова (Хурамхаан), Сэсэгма Цырендондокова (Агаһаа гарбалтай, БГУ-гай хари хэлэнүүдэй факультедэй оюутан). 2-дохи һуурида Агын Буряадай тойрог түлөөлһэн Бальжима Ойдопова гараа. Харин шангай 1-дэхи һуури “Уран” бүлгэм эзэлжэ, тус тустаа Буряадай Президентын болон Правительствын Захиргаанай болон Буряадай соёлой министерствын зүгһөө үнэтэ бэлэгүүдтэ, шангуудта хүртөө. Эдэ бүхы дүнгүүдые мэргэжэлтэ жюри согсолоо.
Тус мүрысөөнэй онсо шэнжэ гэхэдэ, хоёр номинацида 1-дэхи һуурида гараһан дуушад лэ Гран-При шангай түлөө тэмсэхэ ёһотой байба. Тиигэжэ Саян Цымпилов болон “Уран” бүлгэм дахин бэлиг талаангаа харуулба. Тиигэжэ хэнэйнь эгээл эрхим байһые олониитын жюри элирүүлбэ. Тэрээнэй бүридэлдэ политигууд, сэтгүүлшэд, соёл урлалай түлөөлэгшэд, уран зураашад, олониитын ажал ябуулагшад орожо, эрхимэй эрхим дуушаниие элирүүлээ. 11 хүн сооһоо 5-иинь “Уран” бүлгэмэй түлөө, 6-иинь Саян Цымпиловэй түлөө байжа, Гран-При шангай (мүнгөөр һиилэжэ бүтээгдэһэн морин хуурай) эзэн боложо тодорбо.
Тус мүрысөө эмхидхэн байгуулһан “Ариг Ус” телекомпаниин зүгһөө Буряадай Президентын болон Правительсвын Захиргаанай Үндэһэтэн хоорондын хэрэгүүдэй болон эрхэтэдэй эдэбхи үүсхэл хүгжөөлгын хороондо, “Ниппон” гэһэн оршуулгын түбтэ, “Росгосстрах” компаниин Буряадай хэлтэстэ баяр хүргэнэбди.
