Елэн боро костюм, сагаан торгон самса үмдөөд, багахан горох зурагтай бабочка зүүһэн, буржад гэһэн үһэеэ долгитуулан һамнаһан зураг шэнги гоё энэ хүниие нэгэ тээ хараа һаа, ямар киноактер, телезвезда гэжэ түбһэн хүн гайхажа магад. Тэрэ ехэшье эндүүрнэгүй, энэмнай кинодошье буулгуулһан, өөрөөшье буулгаһан, театрташье наадаһан, телевиденитэйнш туршаһан хүн ааб даа. Харин Баатар Цыденовичые бүришье хоморой мэргэжэлтэй гэжэ мэдэхэ хүниинь мэдэхэ, танихагүй хүн үдэр бүри дуулажал байдаг гээшэ. Зоной нюдэндэ харагдахагүйшье һаа, үдэр бүри угсаата арад түмэнтэйгээ радиогоор мэндэшэлдэг мэргэжэл хэзээ нэгэтэ үни шэлэһэн манай хөөрөөнэй баатар (ородоор һаа герой, одоол буряад арадай баатаршье гээ һаа гэхээр) Сэбээнэй Баатар далатай болоо гэжэ оройдоошье этигэхээр бэшэ. Үнөөхил салигар зандаа, хошонгууша хүхюугээ алдаагүй. Хаа-яа түрэ найр, юбилей дээрэ зугаахина бас-баритон хоолойгоо туршан дуугархадань, түбһэн хүн заригад гэжэ хүсэтэ абьяаста абтадаг. Буряадай Левитан гэжэ тэрэниие хэншьеб дэмы бэшэ нэрлээ даа.
Баатар Цыбенов Хойто-Агадаа эхин һургуули түгэсхөөд, Агын нэгэдүгээр дунда һургуулида һураа. Багаһаа хойшо уран һайханай улигтай, шүлэг хэлэхэ, дуушье дуулахаһаа тунхаридаггүй, багшанар наада тоглоо хүтэлхыень даалгаха дуратай агша һэн. Тэрэнэй хажуугаар хара ажал багаһаа хэһэн хүдөөгэй хүбүүн шамбай бэрхэ һааб даа, аргагүй бэрхээр теннис наададаг байһан, областиин чемпионшье болоһон байха. Бэлигтэй хүн бүхыдэ бэлигтэй гэдэг. 1960 ондо Москвагай гүрэнэй соёл урлалай институдтэ (мүнөө академи) режиссерой факультедтэ орожо һураа. Дүүргэһэнэй удаа Буряад драмын театрта артистаар хэдэн жэл хүдэлөө. Театрай гол зүжэгүүдтэ олохон дахин оролсожо тоглоо. Теэд сэдьхэл бодолыень агаарай долгин, эфир («агаарай дээдэ, гэрэлтэдэг үень» гэжэ эртын грегүүд хэлэхэ һэн) удаанаар эзэлээ. Гэбэшье Мельпоменын урлалай тэнгэридэ урбаа бэшэ, театрай ажалда ондоо талаһаань оролсохо арга олдоо.
1970 ондо республикын радиокомитедтэ дикторээр хүдэлхэ эрэ хүниие шэлэн абаха конкурсдо шалгаржа, Баатар Цыбенов диктор болобо. Тэрэ гэһээр мүнөө болотороо энэ ажалдаа хүдэлһөөр. Энэмнай онсо орёогойнгоо хажуугаар харюусалгань аргагүй ехэ ажал юм. Дүшэ гаран жэл соо Баатар Цыбеновэй хоолой Буряадай радиогой эфиртэ үдэр бүри зэдэлдэг. Дүшэ гаран жэл соо нэгэл жэгдэ тиимэ дабтаса, үдэр бүриин таһалгаряагүй ажал. Ажал гээшэ жаргал гэдэгынь энэ хүнэй хубида одоол үнэхөөр бэелһэн зүйл.
Баатар Цыбеновэй радиодо хүдэлжэ эхилһэн далаад-наяад онууд ехэ һонин, солгёо хүхюун саг, буряад соёлой дэбжэлтын оршон байгаа. Радио гээшэмнай тэрэ үеынгээ соёл урлагтай, уран зохёолтой, театртай ехэ холбоотой, нэгэн бүхэли гэхээр хүгжэһэн, тиигээдшье буряад радио хадаа өөрөө буряад соёлой нэгэ хуби, тэрэниие хүгжөөлсэһэн тулга зүйлнүүдэй нэгэн болоно. Жэшээнь, буряад дуунай хүгжэлтэдэ аргагүй ехэ үүргэ дүүргэһэн «Баян талын аялга», тэрэ дамжуулгые залгуулан уншадаг Баатар Цыбенов хоёр буряад соёлой бренд боложо тодороо. Һүүлэй жэлнүүдтэ зоной гуйлтаар оперо баледэй театрай сценэ дээрэ «Баян талын аялга» гарадаг болонхой. Бау Ямпиловай суута увертюрын солгёон аялгаар эхилэн, буряад дуунуудай зэдэлхэдэ, энэ һайндэрые заатагүй суута диктор Баатар Цыбеновэй залгуулан хүтэлхэдэ элдэб үеын харагшадай зосоо ёһото «катарсис» (үндэр мэдэрэл, бахаа ханалга) мүндэлдэг. Уран зохёолой хамаг түрэлые – туужа, үгүүлэл, шүлэгүүдые Баатар Цыбенов хуу уншажа гараһан, буряад драмын артистнуудтай хамта олон зүжэгүүдые бэшэлсэһэн, радиогой архивта олон тоото хүдэлмэринүүдынь үлэнхэй юм.
Баатар Цыденович Цыбеновэй хэһэн ажалынь олониитын үмэнэ элирэнхэй. Тэрэ Буряадай арадай артист, Россиин Федерациин габьяата артист гэһэн нэрэ зэргэнүүдтэй, «Эсэгэ ороной үмэнэ габьяатай байһанай түлөө» орденой медальда хүртөө. Голынь хадаа арад зонойнгоо хүндэ хайрада хүртөө. Ага нютагай алдар суута хүбүүдэй тоодо нэрэнь орохол ёһоороо ороо.
Үрэжэлтэ дэлхэйдэ ургаһан алаг сэсэг һайхан, үргэлжэ хүдэлмэри хэһэн шиираг бэе һайхан. Үшөө дээрэнь Бурханай үгэһэн бэлиг талаан, мүхэшэгүй абьяас хүсэл.
Мүнхэжаб Очиров
