Нютаг оронойнгоо түүхэ шэнжэлэгшэ, уран зохёолшо, багша, Агын тойрогой хүндэтэ эрхэтэн Бадма-Базар Намсарайн түрэһөөр 100 жэлэй ойн баяр энэ жэлдэ тэмдэгдлэгдэбэ. Тиигэжэ тэрэнэй алдарта ойдо зорюулагдаһан шэнэ номойнь арамнай апрель һарын эхеэр Ага дээрэ үнгэрбэ. Ойн һайндэрнүүдэй үедэ эрдэм-туршалгын бага хурал 2 үдэрэй туршада гурбан хубяар үнгэрөө.
Бадма-Базар Намсарайн – багша, уран зохёолшо, һэдхүүлшэ, хизаар ороноо шэнжэлэгшэ, Агын тойрогой Хүндэтэ эрхэтэн, Россиин уран зохёолшодой, һэдхүүлшэдэй холбоонуудай гэшүүн, СССР-эй Георгафическа бүлгэмэй бодото гэшүүн, «Арадай гэгээрэлэй отличник», багшын ажалай ветеран, “Хүндэлэлэй тэмдэг” орденоор, хэдэн медальнуудаар шагнагданхай. Хүндэтэ багшын ойн баярай хэмжээ ябуулгануудта олон хүнүүд хабаадаа, түрэлэйнь зон, багшанар, хизаар орноо шэнжэлэгшэд, шабинарынь. Түрэһэн тоонто Шулуутай нютагайхидынь, Һүдэнтынхид мастер-класс үнгэргөө.
Тэрэнэй хүүгэд: биологиин эрдэмэй доктор Баяр Намсараев, педагогикын эрдэмэй кандидат Цыдлыма Бадмаевна Намсараева гэгшэд хабаадалсаа.
Бадма-Базар Намсараевич эдир багашуулые уран бэшэгтэ һургаха, түрэл буряад хэлэндээ дурлуулха, ёһо заншал һэргээхэ хэрэгтэ бүхы мэдэсэ шадабарияа дамжуулһан габьяатай. Түрэл тойрогойнгоо олон һургуулинуудта хүдэлһэн ажалай баян намтартай. Һүдэнтын һургуулида хүдэлжэ байхадаа “Хамтын ажалшан”, “Агын үнэн”, “Толон” һонинуудта эдэбхитэй бэшэжэ толилуулдаг байгаа. Республикын хэмжээнэй «Хараасагай» сэтгүүлдэ зохёолнуудаа толилуулдаг байһан юм. Хүүгэд энэ хэмжээ ябуулгые Агын тойрогой Багшанарай мэргэжэл дээшэлүүлгын дээдэ һургуулиин үүсхэлээр үнгэргөө.
Бадма-Базар Намсарайн шүлэг, найруулга зохёоходоо, арадай ама үгын баялигые хэрэглэжэ, ураар бэшэдэг байһан. Шудалһан эрдэм бэлигээ, дүй дүршэлөө, мэргэжэл шадабарияа эдир үетэндэ дамжуулха наһанайнгаа үүргые үнэн сэхээр дүүргэһэн хүндэтэй багшанарай нэгэн гээшэ.
Бадма-Базар Намсараевич Намсарайн 1912 ондо Агын тойрогой Шулуутай нютагта түрөө. 1924 ондо Хойто-Агын эхин һургуули дүүргээд, Агын хоёрдохи шатын һургуули 1930 ондо түгэсхөө. Тэрэ гэһээр округой һургуулинуудта табяад жэлэй туршада түрэл хэлэ болон литература багшалаа, Һүдэнтын һургуулида 1938 ондо эмхидхэһэн “Булаг” гэжэ уран зохёолой кружок ба тиимэл нэрэтэй гар бэшэлгын журналынь мүнөө хүрэтэрөө эдир үхибүүдэй оюун бэлигээ һалбаруулха гуламта зандаа байдаг. Хамта дээрээ 7 номынь хэблэгдээ. Б-Б. Намсарайн эдир багашуулда зорюулһан “Булаг” (1973) гэжэ шүлэгүүдэй, “Алтаргана” (1976), “Хүлэг хээр” (1988), “Сагаалган” гэһэн рассказуудай согсолборинууд болон “Онтохонуудай суглуулбари” хэблэгдэһэн байна.
Агын дайдын гайхамшагта хүбүүдэй нэгэн, багша Бадма-Базар Намсарайн наһанай баян намтар найруулагша Барас Халзановай Свердловско киностудида буулгаһан баримтата киногой үндэһэн боложо үгөө.
Наһанайнгаа нүхэр Санжижаб Сандановатай 7 хүүгэдые түрэжэ, гарынь ганзагада, хүлынь дүрөөдэ хүргэһэн габьяатай. Олон хүүгэдынь багшын мэргэжэл шэлэжэ, тэдэнэй гэр бүлөөрөө багшалһан жэлнүүдые хамталха болоо һаа, 100 гаран жэлнүүд болохол даа.
Нара хараһан энэ номойнь хоёрдохи хубида тэрэнэй хүбүүнэйнь нэгэнэй зохёолнууд ороо гэбэл: мэдээжэ уран шүлэгшэ Владимир Намсараев «Булаг» гэжэ уран зохёолой нэгэдэлэй гэшүүн боложо зохёохы намтараа эхилһэн, хожомынь М. Горькиин нэрэмжэтэ литературна институт дүүргэһэн, шүлэгүүдэй хэдэн олон согсолборинуудай автор, Россиин уран зохёолшодой болон һэдхүүлшэдэй холбоонуудай гэшүүн, Россиин Федерациин соёлой габьяата хүдэлмэрилэгшэ, Буряад Республикын һэдхүүлшэдэй Ярослав Гашегай нэрэмжэтэ шангай лауреат байһан юм.
Тиимэл даа, үлирэй эшэһээ хартаабха ургадаггүй ха юм. Байгаалиин энэ табисуурые эбдэхэ ямаршье хүсэн байхагүй гээшэнь тон үнэн!
