Россиин арадай артист Михаил Елбонов, мүнөө абаад харахада, хэдэн арбаад жэлнүүдэй туршада энэл хэбээрээ тайзан дээрээ дуулажа, наадажа ябаһаар олохон лэ хүнүүдэй нюдэндэ харагдана ёһотой. Ямарханшье хүн өөрын бага наһатай байдаг...
Холын хойто Хурамхаанай аймагай бишыхан тосхон Угнаасай. Энээхэн тосхон намагта орожо хосорхонь гэжэ тэндэ ажаһуужа байһан айл зонуудые баранииень хүршэ тосхондо – Арзгуунда нүүлгэһэн байгаа. Михаил Гомбоевич мүнөө тоонто нютагаа эрьежэ ошоходоо хооһон талада, түрэһэн гэрэйнгээ ћууриие хараад лэ бусадаг. Эсэгын ехэ дайнай дүүрэһэн жэлэй намар энээхэн мүнөө үгы тосхондо түрэћэн, эльгэ зүрхөөрөө, хүйһөөрөө холбоотой газар дэлхэйн энээхэн булангые юунһээшье ехээр сэгнэжэ, хүндэлжэ, үргэжэ ябаһан Михаил Гомбоевич алишье сагта аймаг нютагтаа ошоходоо, алад гарангүй һүгэдэжэ ябадаг хүн юм.
Тиимэһээл нютаг дайдаһаань харалтатай, үргэмжэтэй, урагшатай, азатай ябана гээ һаа хэн арсахаб даа? Азатайл даа, нээрээшье, Михаил Гомбоевич.
Аялга дуунда дуратайшуулда айхабтар ехэ бэлэг болохоёо байһан энэ үдэшэдэ Михаил Елбоновой дууладаг дуунуудые оперымнай театрай дуушад Намхайн Мөнхзул, Билигма Ринчинова, «Байгал» театрай дуушад Дандар Бадлуев, Болод, Сэсэгма Сандиповтан, филармониин дуушан Софья Данзанэ, эстрадна дуушад Чингис Раднаев, Галсан-Нимын Гандиг, Надежда Гармаева, Шэтэһээ Оюна Дарижапова, П. Чайковскийн нэрэмжэтэ искусствын колледжын оюутад болон бусад дуушадые шагнаха аргатайт.
Тиихэдэ түрэл тайзан дээрээ ахамад артистынгаа дуунай үдэшэ үнгэргэжэ байхада Буряадай драмын театрай артистнар яагаад дэмжэнгүй байхаб даа. Театрай артистнар Лариса Егорова, Дамбадугар Бочиктоев, Сэдэн-Ешэ Бимбаев, Сэсэгма Дондокова, Ринчин Турлаков гээд дуушад байха, тиихэдэ артистнар Олег Бабуев Дарима Лубсанова хоёр энэ үдэшые хүтэлжэ гараха ёһотой.
Михаил Гомбоевич һургуулида ороогүй бишыхан наһандаа гэрэй орой дээрэ гүйжэ гараад «Би артист гээшэб» – гэжэ һүүхирдэг байһан, тиигэжэ бүхы наһаараа артист ябаһан дуратай дуушантайгаа уулзахаяа яарыт даа, хүндэтэ харагшаднай!
