Дашарабдан Гомбодоржиевай Агын багшанарай училищи дүүргээд, Ленинград хотын дээдэ һургуулида һурахаяа ошоходонь, ехэл эрдэмтэй хүн болоод ерэхэ гэжэ түрэһэн эжынь этигэн хүлеэдэг һэн. Хүдөө нютагайхид багша, доктор, агроном, зоотехник, инженер гэһэн лэ мэргэжэл шэлэхые оролдодог бэлэй. Харин Дашарабдан Ленинград хотын театрай, хүгжэмэй, киноматографиин институдтэ һуража дүүргээд, 1958 онһоо Хоца Намсараевай нэрэмжэтэ буряад драмын театрай артистаар хүдэлжэ эхилһэн юм. Тэрэ үеын артистын ажал нилээн хүндэ, ажабайдалынь зүдэрүү һааб даа – эбхэгдэдэг ороёо шэрэжэ, ашаанай машинада һуугаад, хүдөө нютагуудаар эндэ тэндэ айлаар хоножо ябаха. Артистын ажалда үнэнхэ зүрхэнһөө дурлаһан лэ зон эдэ бүгэдые тэсэжэ, туйлажа гарадаг байгаа гээшэ. Дашарабдан Гомбодоржиев өөрынгөө маягта, нюур шарайда, онсо абари зандаа таруулагдаһан энеэдэтэй, комическэ рольнуудые наададаг байгаа. Нэгэтэ түрэһэн нютаг Зүдхэлидөө гастрольдо ошоходоо, Дашарабданай архинша Базарай роль үнэншэмэ бэрхээр наададахадань, түрэһэн эжынь: “Үгы, иихэдээ, хүбүүмни, архиншаниие һажаажа наадаха һургуулида аяар холын Ленинград хотодо һураа гээшэ гүш? Ондоо хүн зоной хүндэлхөөр мэргэжэл олдоогүй юм гү?“ – гэжэ ехэтэ голхоржо, зүжэгэй үедэ бодоод, гаража ябашаһан юм гэлсэдэг.
Долоон жэлэй туршада Дашарабдан Буряад драмын театрай артистаар хүдэлөөд, саашань журналистын, радиогой сурбалжалагшаар хүдэлһэн юм. Эгээл тэрэ үедэ Эрхүүгэй кинохроникынхид Улаан-Үдэдэ кино оршуулжа эхилхэдэнь, Дашарабдан һайнаар табигдаһан хоолойтой, мүн ород буряад хэлэндээ бэрхэ һэн тула оршуулгашье хэжэ ядаагүй. Тэрэнэй нүхэр Цырегма Батоевна “В бой идут одни старики” гэһэн фильм оршуулалсаһанаа һанана. Мүнөө үеын оршуулга бэшэ, тон буряадаар хэлэһэн үгэнүүдынь наадажа байһан артистын аманайнь нээгдэхэдэнь тудаха, таараха ёһотой харюусалгатай ажал байгаа. Цырегма Батоевна Дашарабдан нүхэртэеэ суг Агын багшанарай училищидэ һураһан юм. “Дашарабдан намһаа нэгэ жэл дээгүүр һурадаг һэн. Баяан дээрэ гоёор наадаха, бидэ, оюутад, тэрэ хүгжэм доронь вальс хатардаг бэлэйбди. Артист болохо һаналаа хэндэшье хэлээгүй байгаа. Буряад драмын театрай артист болоод, артистанарай хамтын байрада 32-дохи таһалгын түлхюур абаад ерэхэдэнь, бидэ гэр бүлэ болоо һэмди. Нүхэрэйнгөө тайзан дээрэ зүжэгтэ наадажа байхыень харахадаа, ехэтэ һанаата болодог һэм. Алдуу эндүүень бэдэрхэш” – гэжэ Цырегма Батоевна хөөрэнэ.
1965 ондо Дашарабдан Гомбодоржиевай артистынгаа ажал орхиходо эжы наһанайнь нүхэр хоёр ехэтэ баясаһан юм. Зүгөөр суг ажаллаһан нүхэдынь, танил зон, иимэ бэлигтэй артист аад, юундэ ажалаа орхибо гээшэб гэжэ ехэ гайхаа бэлэй. Теэд сурбалжалагшын ажал баһал һонирхолтой, радиогоор элдэб дамжуулга хэхэ, радионайруулга болон зүжэгүүдтэ хабаадаха, һонин зонуудтай уулзаха. Мүн хажуудань, кинофильмнуудые оршуулха баһал һонирхолтой ажал ха юм даа. “Оршуулга хэхэеэ абяа буулгадаг найруулагша ерээд, бултыень бэшэжэ абаад, һөөргэнь Эрхүүгээ абаашадаг һэн. Тэрэ үедэ буряад хэлэнэй байдал нилээн дээрэ байгаа. Харин мүнөө байдалнай хэсүү, Буряадаар кинофильм оршуулхаһаа байха, мэндэеэшье ородоор хэлсэдэг саг болонхой. Хүн зомнай ехэ эрдэмтэй болоол гээшэ аабза” – гээд Цырегма Батоевна энээхэн байдал тэгшэлхые оролдоно. Цырегма Батоевна өөрөө Улаан-Үдын багшанарай институт дүүргээд, нүхэрэйнгөө хажууда оршуулгын ажал хэхэ, бүхэли наһандаа “Буряадай залуушуул” гэһэн газетэдэ корректороор хүдэлһэн юм. Хүдөө бэшэгшэдэй хүдэлмэринүүдые заһаха, шэмэглэхэ, баһал зохёохы ажалтай жэшээтэй. Энэ гэр бүлэ гурбан хүүгэдые хүн болгоһон. Гэр бүлэеэ, түрэл гаралаа дүнгэлсэхэ баһал харюусалга ехэтэй ябаһан Дашарабдан Гомбодоржиев шадал шамбай 49 наһандаа алтан дэлхэйтэеэ хахасаһан юм. Гэбэшье, эсэгын хүмүүжэлээр үндыһэн хүүгэдынь булта найдамтай харгыда гаранхай, мүнөө ехэ хүбүүн сэрэгэй полковник, дунда хүбүүн врач, одхон эрхэ басаганиинь хүгжэмшэн. Наһанайнь нүхэр Цырегма Батоевна үнэр баян аша зээнэрээ тойруулан, эхэ зургаан зүйл, хамаг амитадай туһын тула бурхандаа зальбаран, ан бунхан ажамидарал хүсэн буянтай ажаһууна.
