Шарль Перрогой “Золушка” гэһэн зүжэг хэдэн үеын хүүгэдые баясуулдаг, үе үедөө нэгэшье хуушардаггүй ехэ һонин онтохон гээшэ. Найруулан табигшын хүнгэн бэшэ ажалда түрүүшын урагшатай алхам хэһэн артисткатай уулзажа, нэгэ хэды асуудал табиһан байнаб.
- Бэлигма! Энэ зүжэг табилга танай эгээл түрүүшын найруулга болоно гү?
- Үгы, энэ хоёрдохи ажални. Эгээл түрүүн “Джек и бобовое зернышко” гэһэн зүжэг найруулаа һэм. Театраймнай ахамад найруулагша Эрдэни Жалцановай үшөө онтохо-зүжэг табихаш гү гэжэ дурадхал оруухадань, ехэ омогорхон, энэ “Золушка” онтохо шэлэжэ абаа һэм. Анхан хэзээб даа, иимэ зүжэг табигдаад, үхибүүдтэ харуулагдадаг байһан аад, хуушаржа зогсоогдоһон юм. Иимэ хүнгэн, һаруул, һайхан сэдьхэл түрүүлдэг онтохон заабол театрай репертуарта байха ёһотой.
Шэнээр найруулһан зүжэгтэ ехэ һонин арга хэрэглэгдээ. Мүн артистнар өөһэдөөшье найруулгада хабаадалсаа, харагшадта Золушкын гутал үмдэжэ туршахыень дурадхагдаа. Илангаяа ошото гал мүшэд – фейрверкнүүд бишыхан харагшадтамнай һайшагдаһан байна.
Юрэ зүжэг заншалта ёһоор табиха бэшэ, баһа өөрынгөө онсо хараса, арга хэрэглэхэеэ һанааб. Шэнэ арга – һүүдэр болон футаж-зурагуудые Золушкын хаанай ордон руу ошожо ябаһан харгыда хэрэглээбди. Намтай хүдэлжэ хүүхэлдэйнүүдые бүтээһэн уран зураашамнай – Сэсэг Дамбаева. Сэсэг нёдондо жэл Санкт-Петербургын искусствын академи дүүргэхэдээ, “Золушка” онтохоноор дипломоо хамгаалһан юм. Тэрэнэй ошохынь урда тээ хоюулан хэлсэжэ, энэ онтохо шэлээбди. Сэсэг эскизүүдые, багахан македүүдые бэлдээ. Эндэ ерэхэдэнь, эскизынь халта ондоо болгоод, хүүхэлдэйнүүдые бүтээгөөд лэ, зүжэгөө табяабди.
- Бэлигма, та яагаад драмын бэшэ, хүүхэлдэйн театрай артист болоо гээшэбта?
- Би Амидхаашын дунда һургуулида һуража байхадаа, арадай дуунуудые дууладаг, хатардаг, зүжэгтэшье наададаг һэм. Тиигээд, Санкт Петербургын искусствын академидэ тэрэ жэл туршалгын бүлэг артистнарые абаһан юм. Бидэ 4 жэл һурахадаа, драматическэ болон хүүхэлдэйн артист болохо хоёр шэглэлтэй байгаабди. Тиигэжэ хүүхэлдэйн театрта хүдэлжэ эхилээб.
- Та артистааршье наадахадаа бэрхэ байнат. Зүгөөр, энэ найруулагшын ажалда хэһэн алхамуудтнай яһала амжалтатай байба. Энээнээ саашань үргэлжэлүүлхэ хүсэл бии гү?
- 2014 ондо манай театр өөһэдынгөө артистнарые Санкт- Петербургын академидэ заочно түхэлөөр һургаха түсэбтэй. Би найруулагшын факультедтэ һураха хүсэлэнтэйб. Харин мүнөө шэнэ онол арга бэдэрхэ, туршаха, юрэл зохёохы ажал хэжэ байха хүсэлтэйб. Искусствын академидэ һурахадаа, Сергей Дмитриевич Черкасский гэжэ ехэ бэрхэ багшатай дайралдажа, тэрэнэй олон юумэндэ бидэниие һургаһандань баясанаб.
Һайн даа, Бэлигма! Ажалдатнай амжалта хүсэнэб. Үшөө олон гоё һайхан үльгэр онтохонуудаар харагшадаа баясуулжал байгыт даа.
