Монголой эрдэм гэгээрэлэй ба соёлой министерство 3-һаа 5 хүрэтэр дуратайшуулые бакалавриадай шэглэлээр соёл ба искусствын университедтэ һургажа, бакалавр болгожо гаргаха байһанаа мэдүүлнэ. Тиихэдээ хүгжэмэй болон уран зурагай талаар дунда мэргэжэлтэй хүнүүдые абаха юм. Эндэ абтаһан хүнүүдтэ 10 һарын туршада һара бүриин мүнгэн тэдхэмжэ (стипенди) үгтэжэ байха. Шэлэн абалга Буряад Республикын Соёлой министерствэдэ үнгэргэгдэхэ, Монголой соёлой дээдэ һургуулиин багшанар Пурэвхуу Тэмуужин болон Цэрэн Чулуунсэсэг гэдэг багшанар шэлэн абалгада хабаадахаяа ерэхэ.
Россиин Федерациин наһаа хүсэһэн эрхэтэд, Буряад Республикын дэбисхэр дээрэ ажаһуудаг гэһэн тэмдэгтэй хүнүүд мэдүүлгэ үгэжэ болохо.
Иимэ мэргэжэлнүүдээр шэлэн абалга үнгэрхэ гэбэл:
Хүгжэмэй искусство:
Арадай дуун. Уртын дуун, түргэн аялгатай дуун.
Морин хуур дээрэ гүйсэдхэлгэ.
Арадай хүгжэмэй зэмсэгүүд.
Монголой хөөмэй дуун.
Уран зурагай искусство:
Монголой уран зураг.
Монголой заншалта уран һиилүүр.
Арһаар, арһан дээрэ уран бүтээлнүүдэй искусство.
Шэлэн абалга гурбан шатаһаа бүридэхэ:
Дурадхагдаһан саарһа, дансануудые харалга.
Мэргэжэл шадабариин талаар шэлэн абалга.
Хөөрэлдөөн
Һураха дуратайшуул 2012 оной июниин 1 болотор саарһа дансануудаа иимэ хаягаар тушааха: Улаан-Үдэ хото, 670010, пр. Победы, 17, утас 22-39-71, Искусствын колледжын һалбари болохо «Һуралсалай онол аргануудай республиканска түб» (Буряад драмын театрай талаһаа орохо)
Иимэ саарһа дансанууд хэрэгтэй байха:
а) Шэлэн абалгада хабаадаха тухай мэдүүлгэ;
б) Дунда мэргэжэл олгогдоһон тухай үнэмшэлгын хуулбари;
в) Буряад Республикада ажаһууна гэһэн тэмдэгтэй хубиин дэбтэрэй (паспорт), тэрэниие һэлгэжэ болохо бусад үнэмшэлгэнүүдэй хуулбари;
г) Бэеын элүүр энхые гэршэлһэн эмнэлгын газарай тусхай гуримай лаблаһан баримта (справка);
д) Һуража болохо тухай һуралсалай эмхинүүдэй зууршалга;
е) 3х4 хэмжүүрэй 4 гэрэл зураг;
ж) Элдэб харалга, мүрысөөнүүдтэ, фестиваль наадануудта хабаадаһан тухай гэршэ саарһануудай хуулбари;
Хүгжэмэй искусство гэһэн шэглэлээр һураха хүнүүд ондо ондоо
маягаар гүйсэдхэгдэдэг хоёр хүгжэм наадажа харуулха ёһотой.
Уран зурагай искусство гэһэн шэглэлээр һураха хүнүүд 2011-2012 онуудай туршада зураһан зурагуудаа харуулха.
