Тэрэнэй һүүлэй гушаад жэлнүүдэй туршада бүтээһэн хүдэлмэринүүд долоон хоногой туршада «Сагаан морин» гэжэ киногой танхим соо харуулагдаха юм. Тэрэ фильмнүүдэй тоодо «Константа», «Семейная жизнь», «Иллюминация», «Защитный цвета», «Структура кристалла». 1992 ондо буулгагдаһан «Прикосновение руки» гэжэ фильмээр энэ долоон хоног үнгэрһэн гарагай нэгэндэ түгэсөө.
Эндэ байха үедөө Кшиштоф Занусси Тарбагатайн шэмээшэгүүдэй ажабайдалаар һонирхоо, Ивалгын дасан ошожо, Хамбатан Дамба Аюшеевтай бараалхаа, тиихэдэ Хоца Намсараевай нэрэмжэтэ театрай зүжэгшэдтэй уулзажа, һонирхолтой хөөрөө дэлгэжэ, асуудалнуудта харюусаһан байха юм. Гадна «Польша Буряадай хүүгэдэй нюдөөр» гэһэн уран зурагай үзэсхэлэн хаража, Польско амаралтын үдэрэй һургуулиин һуралсалай жэлэй хаалгын хэмжээ ябуулгада хабаадалсаа.
Улаан-Үдэдэ Польшын киногой дүрбэдэхи фестиваль полягуудай үндэһэн соёлой автономиин, тэрэнэй хүтэлбэрилэгшэ М. И. Ивановагай, тиихэдэ Эрхүү хотодохи Польшын Генеральна консульствын, Москвагай Польшын дээдэ һургуулиин дэмжэлгээр үнгэрбэ гэжэ тэмдэглэхэ шухала.
