«Бурятия» гэһэн Гүрэнэй телерадиокомпани, «Ариг Ус» телевизионно компани, «Буряад үнэн», «Буряад-монгол ном хэблэл» гэһэн хэблэлэй Байшангууд, тиихэдэ «Дхарма» гэһэн Улаан-Үдэ хотын һүзэгшэдэй эмхи гээд энэ хэмжээ ябуулгые дэмжэһэн байха юм.
Хэдэн туужанууд болон рассказуудай номуудай автор, мэдээжэ уран зохёолшо Цыдып Цырендоржиевай Санид Хамба Агван Доржиевай намтар тухай алтан ном нара хараба гээшэ.
Роман арамнайлгын үдэшэ энэ номой удха шанар, тэрэнэй Буряадай сэхээтэнэй дунда дүүргэхэ байһан үүргэ тухай, уран зохёолшын өөрынь наһанай болон зохёохы зам тухай үгэ хэлэһэн зонууд гэбэл: Буряад Республикын Соёлой министрэй орлогшо Добрынин Сергей Александрович, «Хэжэнгын аймаг» гэһэн нютагай байгууламжын толгойлогшо Лхасаранов Геннадий Зундуевич, һүзэгтэнэй «Дхарма» эмхиин хүтэлбэрилэгшэ Нимажап Ильич Илюхинов, түүхын эрдэмэй доктор, профессор Чимитдоржиев Шираб Бодиевич, уран зохёолшод Гармаев Владимир Балданович, михаил Батоин, Владимир Митыпов, хэлэ бэшэгэй эрдэмэй доктор Имихелова Светлана Степановна болон бусад.
Үгэ баянтай, уран хэлэтэй «Ариг Ус» телекомпаниин дамжуулгануудые хүтэлэгшэ Даша-Доржо Болотов һонирхолтой һайханаар хүтэлжэ, энэ үдэшын шэмэг болоһон байна.
«Хододоо үдэр байдаггүй». Энэ хэблэлһээ гараһан буряадаймнай роман уншагшын сэдьхэлдэ энэрхы сэдьхэлэй үрэһэ тарижа, олон түмэн уншагшадтай байхань болтогой!
