Газар дэлхэйдэ ээлжээтэ түрэлдөө хүмүүнэй бэе оложо мүндэлһөөр арадай хэрэгтэ ами наһаяа зорюулһан, Буддын шажанай хэрэгые хүтэлбэрилжэ, найрамдалай түлөөдэ үдэр бүхэнөө зорюулһан гэгээн түрэлтэ Этигэлэй хамбын түрэһөөр 160 жэлэй ойдо, тэрэнэй үндэр нэрэдэ үргэл бариха хубида манай республикын, хүршэ хото, можонуудай, тойрогуудай, тиихэдэ Монголой уран бэлигтэн хүртэбэ.
Ондоогоор хэлэхэдэ энэ дэлхэйдэ бэлигтэй мүндэлөөд, арад зондоо алба хэжэ ябадаг уран зохёолшод, хүгжэмшэд, дуушад, хатаршад, уран зураашад болон һиилүүршэд, алташа, мүнгэшэ дархашуул, юрэл бүхы уран бэлигтэн өөрынгөө арга шадабариие дээдын заяагаар бэендээ шэнгээжэ мүндэлһэн байха, тиимэһээ Этигэлэй хамбын Эрдэнитэ мүнхэ бэедэ, тэрэнэй үндэр нэрэдэ үргэл бариха гээшэ тэдэнэй бэлигэй далайн дүүрэн байхын тэмдэг гэмээр байна.
Ехэ наадан үглөөнэй 9 сагһаа эхилээд, үдэшэ орой болотор үргэлжэлхэ, хабаадагшад мүрысөөнэй гуримаар уран бэлигээ дэлгэхэ, энэнь дүрбэн хуби боложо хубаагданхай. Мүрысэгшэдэй хуби бүриин хоорондуур нэгэ-нэгэ сагай туршада «Булжамуур», «Лотос» ансамбльнуудай, Буряадай Гүрэнэй филармониин, дуун болон хатарай «Байгал» театрай артистнарай концертнүүд харуулагдаха.
Энэ ушараар дэлхэйн бүхы һүзэгтэнтэй суг баярлажа байһан манай Буряадай арад түмэн, доро дороо хүн бүхэнэй өөрынгөө түрэһэн үдэр мэтэ сэдьхэжэ байһые мэдэржэ, энэ үдэрые агууехэ һайндэр гэжэ тоолон, та олоноо үнэн һайхан сэдьхэлһээ амаршалнабди!
