Тиигэжэ эхилээд лэ жэлһээ жэлдэ боложо байдаг республикын, уласхоорондын хэмжээнэй олон тоото мүрысөө-харалгануудта туйлажа захалһан амжалтануудыень олондо мэдээсэл тараадаг хэрэгсэлнүүдэй тэрэ үеын мэдээсэлнүүд сооһоо мэдэхэ болообди.
Мүнөө Арюуна Цыденжапова тухайгаа дахин лэ таанарайнгаа һонорто хөөрэхэ ушар дайралдаба гээшэ. Юуб гэхэдэ Арюуна 2008 ондо Улаан-Баатар хотын Соёл урлагийн их сургууль (СУИС, университет культуры и искусств) эрхим һайнаар дүүргэжэ, Монгол ороной оперо болон баледэй академическэ театрта оперын дуушанаар абтаһан байгаа. Дүрбэн жэлэй туршада оролдосотой һайнаар ажаллажа, олон тоото концертнүүдтэ хабаадажа, оперын гол рольнуудые итальян, ород, француз, монгол хэлэнүүд дээрэ гүйсэдхэжэ, бэлигээ гүйсэд дүүрэн харуулжа шадаа. Энээнэйнь үрэ дүн гэхэ гү, али тэрэнэй аша габьяа юм гү, байгша оной дүрбэдугаар һарын 27-ндо оперын дуушадай анхан байгуулагдаһаар 60 жэлэй ойн баярай найр дээрэ «Улсын дуурь бүжгийн эрдмийн театрын» гоцлон дуучдийн түүхээр ном-альбом гараһан, тэрэ альбом соо Арюунын, тэрэнэй гүйсэдхэһэн рольнуудтай, дүрэ зурагууд оруулагдаһан байба. Тиигэжэ тэрэл найр дээрэ Монголой залуушуулай холбооной зүгһөө «Монгол, тандаа зүтгэе!» гэһэн медаляа монгол орон Арюунадамнай хүртээбэ гээшэ. Энэ хадаа Монгол ороной үндэр ехэ хайра шагналнуудай нэгэн болодог.
Удаань, мэнэ һаяхана, Улаан-Баатар хотодо үнгэрһэн Монгол ороной габьяата артист, профессор Д. Бандийн нэрэмжэтэ уласхоорондын дуушадай конкурсдо Арюуна Цыденжапова лауреат болобо гэһэн баяртай мэдээсэл абтаба. Үшөө СУИС-ын оюутан байха үедөө, 2006 ондо, Д. Бандийн нэрэмжэтэ аари, романснуудай конкурсда илажа, Гран-При шагналда хүртэһэн байгаа.
Заншал, хэлэ нэгэнтэйшье һаа ондоо гүрэндэ һураад, тэндээ ажаллажа ябаһан Арюуна басагамнай түрэл Буряад дайдынгаа нэрэ һүлдые бусадай дунда үргэжэ ябаха буянтай, бэлигтэй байба ха юм даа, саашадаа олоһон шэлэһэн энэ мэргэжэлээ улам мүлижэ, олоной дунда омог дорюун ябахань болтогой!
СССР-эй арадай артист Гомбо Цыдынжаповай нэрэмжэтэ оперо болон баледэй академическэ театрай гол дуушадай нэгэн Баяр Цыденжаповай абын омогорхол, абын баярые та олондоо дамжуулан – Николай Шабаев.
