Олон барилдаанда шалгаржа тодорһон бүхэнүүд арад зонойнгоо дунда суурхахал ёһоороо суурхадаг. Олоной нюдэн дээрэ бар хүсэн, дүршэл, шадабаряараа нүгөөдэ барилдагшаяа унагааха гээшэ ёһотой баатаршалга ха юм. Элүүр, сэбэр бэетэй, шүрбэһэлиг бэхи балсан, булшантай бүхэнүүдэй хоёр тээһээ уулзахые харахада, ямар бахатай байдаг бэ?! Газар һабардан, альгаа дэлгээн, дүрэ буляалдан татасалдажа, барилдааша бүхэн өөрынгөө шадабари, мэхэ хэрэглэн барилдагшаяа унагааха гэжэ оролдоно. Барилдаашанай хара хүсэнһөө гадна, шадабари, мэхэ гохо олон. Гохошье хэжэ, ташаалжашье, дэгээдэжэшье болохо. Хүл шүүрэжэ абаад, газарһаа таһалан, хиидэ үргэжэшье магадгүй.
Барилдаашадай халаан – хүүгэднай ехэшүүлэй барилдаа аргагүй һонирхон харадаг, барилдагшадта дурладаг гээшэ. Тиимэ дээрэһээ хүүгэдэй наадан соо барилдаан онсо һуури эзэлдэг. Барилдаанда һургадаг багшатай, үхибүүдээ барилдуулжа наадхуулдаг нютагуудһаа барилдааша хүнүүд тодорон гаража, нютагаа суурхуулдаг, арад олоноо баярлуулдаг.
Цогто НОМТОЕВ
ЭРЫН ГУРБАН НААДАНАЙ ГИМН
үг. Н. Шабаевай, хүг. Г. Баттулгын
|
Эртын сагһаа эхитэй Эрын гурбан наадан лэ – Сэлгеэ Буряад дайдымнай Сурхарбаанай наадан лэ! Эрын солынь үргэһэн Эрын гурбан наадан лэ!
Долоон галаб саанаһаа Домог болоод тодорһон, Эрхим эры тодолһон Эгээл һайхан – барилдаан!
Эртын сагһаа эхитэй Эрын гурбан наадан лэ – Сэлгеэ Буряад дайдымнай Сурхарбаанай наадан лэ! Эрын солынь үргэһэн Эрын гурбан наадан лэ! |
|
Дүрбэн салир туруугаар Дэлхэйн хүрьһэ дорьбоогоод, Дэлһээ, һамбай хиисхүүлээд Дүүлин гүйдэг хүлэг лэ!
Эртын сагһаа эхитэй Эрын гурбан наадан лэ – Сэлгеэ Буряад дайдымнай Сурхарбаанай наадан лэ! Эрын солынь үргэһэн Эрын гурбан наадан лэ!
Зэбын түргэн ниидээн соо Жэгүүр үдэн дуулана. Баатар һуршын солые “Бар(а)-оо”, – гэжэ дуудана!
Эртын сагһаа эхитэй Эрын гурбан наадан лэ – Сэлгеэ Буряад дайдымнай Сурхарбаанай наадан лэ! Эрын солынь үргэһэн Эрын гурбан наадан лэ! |
