«World music» – «Хүгжэмэй юртэмсэ». Энэ шэглэлээр туршалгануудые хэдэг бэлигтэндэ энэ нааданай үүдэнүүд нээлгэтэй гэхэ гү, али хүгжэм дуунай талаар арадай зохёолнууд дээрэ үндэһэлһэн найруулгануудые хүлеэжэ абаха наадан гээшэ гэжэ ойлгохо ёһотойбди. Эрхэ сүлөөгэй ёһотойл һүлдэ гэхэдэ алдуугүй нүүдэлшэдэй соёлһоо һабагша татаһан ая дуунууд тэрэл сүлөөтэ зоной ажабайдал, харилсаанууд сооһоо мүндэлһэн мүн лэ сүлөөтэ хүгжэм дуунууд гээшэ гэһэн ойлгосо болохоёо байһан энэ фествиалиин үндэһэн гэел даа.
Тиимэһээ эндэ хабаадахаяа Бразилиһаа, Африкын гүрэнүүдһээ, Дотор Монголһоо, Франциһаа буужа ерэхэ мэргэжэлтэ хүгжэмшэд хүлеэгдэнэ.
Мүнөө жэлэй Ехэ наадан гурбан талмай дээрэ үнгэрхэ гэбэл – Буряадай драмын театрай, Дээдэ-Онгостойн Хизаар ороноо шэнжэлгын үзэсхэлэнгэй, тиихэдэ Гүрэнэй филармониин. Буряад театрай тайзан дээрэ июлиин 11-12-ой үдэрнүүдтэ дуу хүгжэмөө дэлгээд, 13-най үдэр Дээдэ-Онгостой руу «нүүжэ», тэндээ OPEN-AIR тайзан нээхэ юм. Тиихэдэ Гүрэнэй филармониин танхим соо эдэ гурбан үдэрэй туршада кинофильмнүүд харуулагдаха байна: Баяр Дышеновэй «Эхын захяа», «Сансар» студиин буулгаһан Шэнэхээн буряадуудай ажабайдал тухай гурбан баримтата фильмнүүд, тиихэдэ найруулагша Бямбасүрэнгийн Даваагай «Чингис-Хаанай хоёр морин» гэһэн фильм. Һүүлдэ нэрлэгдэһэн энэ фильм соо 2009 оной «Нүүдэлшэдэй ая дуунда» хабаадаһан дуушан Урнаа Шахар-Тугша гол нюурта наадаха байна.
Дээдэ-Онгостойн Хизаар ороноо шэнжэлгын үзэсхэлэндэ Италиин Марко Бравурын «Олон янзын хубинуудые эблүүлжэ бүтээһэн зохёолой хэлэн» («Языки мозаики») гэһэн үндэһэн заншалда эсэргүүсэжэ, ерээдүйдэ хандаһан удхатай харалга эмхидхэгдэхэ, тиигэжэ энэ жэлэй наадан гансашье хүгжэм дуунай бэшэ, мүнөө үеын үндэһэн урлалай наадан боложо үрэдэхэ гэжэ ойлгохо болонобди.
Ехэ нааданай гол тайзан дээрэ дэлхэйдэ мэдээжэ буряад дуушан НАМГАР, Дотор Монголой ANDA UNION, Нигер Республикын BOMBINO, Зимбабве ороной МОКООМБА гэгшэдтэй уулзагдаха юм ха, тиихэдэ OPEN-AIR тайзан дээрэ Бразилиин «BAIANASISTEM» бүлгэм, UULZALGA гэжэ француз-буряад трио, ДАША БАСКАКОВА, Москвагай CISFINITUM гэгшэд дуу хүгжэмөө дэлгэхээр хүлеэгдэнэ.
Юрэдөөл гайхалтай һонин уулзалганууд болохоо байна гэжэ ойлгомоор, хаража хужарлыт даа, хүндэтэ нүхэд.
