Заншалта ёһоороо нүүдэл буряадуудай ажабайдалда тон тааруу гэжэ онсологдоһон, нэгэтэл бии болоһоор хэдэн зуугаад жэлнүүдэй туршада хубилаагүй һэеы гэрнүүдэй харалга үнгэрөө. Дүнгүүдыень июлиин 22-то соносхохо ёһотой.
Тиихэдэ Ехэ нааданай элиржэ гараһан дүнгүүдэй нэгэн гэбэл – эгээл сэбэрхэн дангина басагадай харалга-мүрысөөнэй дүнгүүд тодороод байна. Эндэ Эрхүү можын Ирина Бардамова шангай 3-дахи һуурида, тиихэдэ Буряад ороной Ахын аймагһаа гарбалтай, 2012 оной «Баатар, дангина» хүбүүд басагадай республикын хэмжээнэй харалгада илажа тодорһон Елена Аюшеева шангай 2-дохи һуурида гараа.
Дэлхэйн буряадуудай Ехэ нааданай эгээл сэбэрхэн дангина басагад Агымнайл тойрогто юм байна гэжэ шангай 1-дэхи һуури эзэлһэн Цырена Мункожаргалова, тиихэдэ нааданай Гран-при шагналда хүртэһэн Оюна Нимацыренова хоёр арсаангүй гэршэлбэд гээщэ.
Гадна үльгэр түүрэгшэдэй дундаһаа илагшад тодоржо гараа гэһэн мэдээсэл оронхой. Нэрлэбэл, эгээл эрхим түүрээгшэд баһал Агын дайдаһаа – шангай нэгэдэхи һуурида Дулдаргын Алексей Цырендылыков, хоёрдохи һуурида – Агын аймагай Жаргал Бадмадоржиев. Энэ мүрысөөнэй гурбадахи һуурида Монголой үльгэршэ Одгэрэл Галсанай гараба.
Буряад арадайнгаа гурим заншалнуудые һэргээлсэжэ, саашадань дамжуулжа ябаха аргатайшье, шадалтайшье залуушуул ургажа байгаа юм байна гэһэн этигэлтэй, найдалтай, илажа тодорһон дангина басагадаа ажабайдалайнь харгыда айхабтар ехэ амжалтануудые хүсэн амаршалаял даа!
