Эндэ хаа яанаһаа, бүмбэрсэг дэлхэйн булан бүхэнһөө буряадууд сугларжа, баяртай, хүхюутэй найр наадан 3 үдэрэй туршада наярба гээшэ. Тооложо нэрлэбэл – Москва, Санкт-Петербург, Новосибирск, Красноярск, Томск хотонуудһаа, Саха Республикын, Казахстанай, Хитад ороной, Монголой, Забайкалиин хизаарай, Эрхүү можын болон Буряадай хото хүдөөгэй, хариин гүрэнүүдһээ Франциин, Польшын, Чехиин – Ехэ нааданда дүн хамта 1 700 гаран тамирай болон соёл, урлалай түлөөлэгшэд хабаадаа. Үндэр айлшадай дунда Советскэ Союзай, Монголой баатар, космонавт Жүгдэрдэмидийн Гуррагчаа, Агын тойрогтой нягта холбоо харилсаатай дуушан Иосиф Кобзон, Даша Намдаков, Баяр Бадёнов болон 160 гаран бусад хүндэтэ айлшад байгаа юм байна.
Байн элирһэн дүнгүүдэй зарим тэды дээрэнь тогтохо болоо һаа, загшалта буряад гэрэй харалганда Могойтын аймагай, Эрхүү можын гэрнүүд эрхим сэгнэлтэнүүдые абаа, тиихэдэ Яруунын аймагай табиһан гэрэй эзэд эрхимээр хамгаалһанайнгаа түлөө тусхай шанда хүртөө.
Арадай гар урлалай харалга-мүрысөөндэ Буряад Республикын түлөөлэгшэд шалгаржа гараа гэбэл – Содном Янданов, Эдуард Павлов. Ирина Дагбаева «Үндэһэн маягтай гар бэлэгүүд» гэһэн шэглэлээр хоёрдохи һуурида гараа.
Ехэ нааданда тамиршадай мүрысөөнүүд бага бэшэ һонирхол үүсхээ. Эндэ шатар, барилдаан, мори урилдаан, һур харбалга харагшад олонтойгоор үнгэрөө. Үндэһэн маягаар һур харбалгада Могойтын Болод Ринчинов, нааданай абарга боложо Агын Цыбик Максаров гэгшэд тодороо.
Ехэ нааданай хаалгын баярай оршондо Агын тойрогой толгойлогшо Согто Мажиев «Алтарганынгаа» тугые Монголой түлөөлэгшэ Цэрэндоржийн Лхагвасүрэндэ дамжуулба.
Агын тойрогой захиргаанай мэдээсэһэнэй ёһоор тойрогой һан жасаһаа 12 миллион түхэриг гаргашалагдаа юм ха. Тиихэдэ олон тоото эбээн тэдхэгшэдэй оруулһан хандиб тоолохыншье аргагүй байгаа гэһэн мэдээсэл бии.
Ехэ нааданай түрүүшын үдэшэ, һүниин тэндэ, Россиин баатар Алдар Цыденжаповай дурасхаалда зорюулагдаһан «Алдарай мүшэд» гэһэн хэмжээ ябуулга үнгэрөө гэнэ. Энэнь һүниин тэнгэри өөдэ дэгдэһэн олон тоото зуланууд, түрүүшын зулые Алдарай түрэһэн эгэшэ Арюуна табижа, Агинск һууринай тэнгэридэ яларһан олон мянган мүшэдтэй ниилэжэ харагдаһан зуланууд хаража байһан хүн бүхэнэй сэдьхэлдэ энэрхы мэдэрэл түрүүлжэ байгаа һэн гэжэ харагшад үшөөл мэдэрэлэйнгээ нүлөөнһөө гараагүй хөөрэнэд бэлэй.
«Алтарганын» ээлжээтэ Ехэ наадан 2014 ондо анхан захалһан нютагтаа, Монгол Республикын Хэнтэйн аймагта дэлхэй дайдаар дэлгэржэ тараһан буряадуудаа суглуулжа үнгэрхэ гэһэн шиидхэбэри абажа, Агада бадарһан «Алтаргана» ажалаа түгэсхэбэ.
