…ГАЛДАН БАГША: Ай даа, тэнэгхэмни. Дасан гээшэшни миил шинии өөдөө болоһон байшан ха юм. Энэ минии арада үлгөөтэй байһан Ногоон Дара Эхын дүрэ, оройдоол дүрэ, зураг. Эдэ бүгэдын саада тээ – хогоосон! Дэлхэй гээшэ хогоосон юртэмсэ, басагамни. Эндэ ши бидэ хоёр лэ байнабди. Би – эндэ, ши – тэндэ… Энэ хэшээл һанана бэзэш?
СЭСЭГ: Һанана…
Буряадай академическэ драмын театрай, театрайнгаа 80-дахи хаһые хаангаа, харагшадтаа дурадхаһан «Энэрил хайра» гэжэ зүжэгһөө хэһэг үгтэбэ. Энэ зүжэгые залуу уран зохёолшо, драматург Болод Ширибазаров түрэһэн абгынгаа, элитэ уран зохёолшо Дашарабдан Батожабайн гэрэлтэ дурасхаалда зорюулжа, тэрэнэй бэшэһэн «Төөригдэһэн хуби заяан» гэжэ гурбалжан романай үргэлжэлэл болгожо бэшэһэн байгаа. Россиин урлалай габьяата ажал ябуулагша Цырендоржо Бальжанов найруулан табиба. Тайзан шэмэглэһэн уран зурааша Павел Павлов, гэрэл уран гоёор тааруулагша мэргэжэлтэн Сергей Грачёв Москва хотоһоо ерээ, хүгжэмөөр шэмэглэгшэ Баярма Ламаева, хатар табигша Екатерина Белоусова, хүгжэм шэмэглэгшэ Сергей Страхов.
Россиин дэбисхэр дээрэ шажан мүргэлтэй тэмсэлгын эгээл «халуун хаһын» үе харуулагдаһан энэ зүжэгтэ «Төөригдэһэн хуби заяан» соо хубисхалшадай замаар ошоһон Аламжын Булад багадаа үгэһэн тангаригаа бэелүүлхэ зорилготой нютагтаа Гүрэнэй аюулгүйн комиссар болонхой эрьежэ ерэнэ. Тэр үедэ дасануудтай, ламанартай юунэй болоһые хүн бүхэн һайн мэдэнэ ха юм даа, гэбэшье Буладай досоо гэнтэ болоһон эрид хубилалтын эхин хаанаһааб гэжэ Буряадай арадай артист Зоригто Ринчинов харуулжа, харагшадтаа ойлгуулжа шадаа бэшэ аал даа? Тэрэнэй орлогшо комиссар Меркулов (залуушуулай театрай уряалаар ерэһэн артист Борис Виноградов) өөрынгөө үе сагта үнэн сэхэ комиссар байба ха…
Энэ зүжэгтэ наадажа гараһан артистнарые нэрлэбэл: дасанай шэрээтэ Галдан багша – Буряадай габьяата артист Баяр Бадмаев, Самбуу лама – Буряадай габьяата артист Бэлигтэ Дамбаев, дасанай харьяата Сэсэг – залуу артистнар Оюна Тудупова, Людмила Тугутова, Аламжа – Буряадай габьяата артист Баярта Ендонов, тиихэдэ арайл оройтожо лама болохо шуналда абтаһан бишыхан Дандар – Һасаран Тангатов.
«Энэрил хайра». Энэнь юун гээшэб? Табигдаһан зүжэгые ойлгожо сэгнэхын тула ерэжэ хараха хэрэгтэй ха юм даа.
