“Алтаргана” хадаа угсаатанай үндэһэн заншалдаа хандалга гээшэ. Түүхын ябадалай нүлөөн доро таһаржа тараһан арадай үри һадаһадай уулзалгын баяр ха юм даа. Зарим зоной энэ нааданайнгаа удхые хүсэд ойлгонгүй, “Алтаргана” наадан томо хото городуудтал үнгэргэхэ ёһотой, һүниндөө бэеэшье угааха газар байгаагүй гэхэ мэтэ олон жэжэ, хэрэггүй үгэ хүүр тарааха ябадал дайралдаа. Анхандаа буряад арад зунай нааданда, обоо тахилганда суглархадаа, нэмжыһэн үргэн тала дээрээ хүншүүхэн аргалай уняар доро дабшалжа һуугаад, бүхэ баатарнуудай, мэргэн һуршадай, хурдан шуран хүлэгүүдэйнгээ илалтануудта булта баясан, хүхилдэжэ һуудаг бэлэй.
Харин мүнөө ехэ байлдаанай һүүлээр амиды үлэшэһэн сэрэгшэдээ??? тоолоһон мэтэ, алтан, мүнгэн, хүрэл медальнуудаа тоололсожо, энэ тэрэ зониие буруу дүн гаргаа гэхэ мэтын хэлэ ама гаргажа байхадамнай хайшаа юм? “Алтаргана” наадан бидэниие нэгэдүүлхэ, эблэрүүлхэ зорилготой гэһэн уряа Буряад Республикын соёлой министр Тимур Цыбиков нааданай урда тээ табижа тэмдэглээ бэлэй. Теэд энээниие ойлгонгүй, ехэ нааданай баярта хабаадажа, хүхихэ, зугаалхын орондо Ага һууринаар гүйлдэжэ ябаад, иимэ ехэ хэмжээнэй үйлэ хэрэгтэ яабашье ушараад лэ байдаг бага сага алдуу, дутуу дундануудыень бэдэрэн ябаха гээшэ балайшье һайшаагдахаар бэшэл даа. Наншалдаад, шаасалдахаяа мартаа гэдэгтэл. Иимэ зон үсөөн, гэбэшье... Олонхимнай “Алтарганадаа” баяртайнууд. Тиимэһээ тэдээндэ: “Буряадхан оромнай уужамхан даа, буусаарааш илгараад яахамнайб даа!” – гэжэ мэдээжэ дуунай үгэнүүдээр һануулха дуран хүрэнэ.
