Эндэ һүюур гэһэн байгаалиин ехэ һонин, гайхамшаг үзэгдэл бии юм. Үндэр бэшэхэн хадада газарһаа гараһан нүхэнүүд. Тэдэниие хүн малтаа бэшэ, байгаалиин тиимэ үзэгдэл. Тэрэ нүхэнүүдһээ хүйтэн һалхяар һэбшээлдэг. Урданай зон энэ һэбшээн бэе махабадта ехэ туһатай гэжэ тоолодог байһан. Хүнүүд нюргаяа, хүзүүгээ, үе мүсөө тэрэ һэбшээндэ тодон табяад, бэеэ аргалдаг. Лүдэб энэ нютагай аршаанда жэл бүри ошожо амардаг, тиимэһээ 2-3 жэлэй саана “Нарһатын аршаан” гэжэ дуу зохёогоо бэлэй.
Лүдэб хадаа һара болоод, Москва хотодо үнгэргэгэдэхэ “Семейные династии-2012” гэһэн фестивальда хабаадахаяа байна. Тэрэ фестивальда хүндэтэ айлшанаар Россиин мэдээжэ эстрадна дуушан Валеритай Лүдэб уригдаа. Нёдондо эмхидхэгдэһэн энэл фестивальда хабаадаад, Лүдэб Гран-придэ хүртэһэн юм. Эдэ үдэрнүүдтэ Лүдэб Валеритай хамта дуулаха дуу зохёогоо. Энэ проектыень мүнөө жэлэй фестиваль эмхидхэгшэд зүбшэжэ байна.
Һүүлэй жэлнүүдтэ Лүдэб мэдээжэ уран шүлэгшэ Дулгар Доржиеватай ажаллана. Шүлэгшэн Лүдэбтэ 10 гаран дуунуудай үгэнүүдые бэшээ. Тэдээн соонь “Түнхэн”, “Абадаа”, ”Сагаалган”, “Заяа ехэтэ Ярууна” болон бусад дуунууд байха. Тэдэ шүлэгүүдтэнь Лүдэб хүгжэм зохёоно. Эдир хүгжэмшэн мэдээжэ композитор болохо хүсэлтэй, мүн тиихэдэ Москва хотын бүхы театрнуудые үзэхэ һаналтай. Энэ хүсэлдөө үнэн сэхэ ябахын тула мүнөөнһөө Улаан-Үдын хүгжэмэй 5-дахи һургуулидаа эрхимээр һураха хэрэгтэй гэжэ мэдэнэ. Энэ һургуулиин багшанар Ирина Алексеевна, Ольга Анатольевна, Мария Геннадьевна гэгшэд хүгжэмэй нюуса оньһо Лүдэб хүбүүхэндэ заадаг юм. Лүдэб ганса хүгжэм зохёогоод, дуу дуулажа байдаг бэшэ, мүн Дээдэ-Ивалга нютагайнгаа Дима, Витя, Амгалан, Майдари, Этигэл, Олзон бусад олон нүхэдтэеэ наададаг. Түрэлхидынь түрэһэн үдэрөөрнь амаршалхадаа, боксёрой арһан бээлэй бэлэглээ. Лүдэб тэрээндэнь тон ехээр баярлаа.
