Баярай хэмжээ ябуулганууд арбан һарын нэгэнһээ долоон үдэрэй туршада театрай тайзан дээрэ үнгэрхөөр хараалагданхай. Республикын засагай зургаанууд, урлалай болон соёлой эмхинүүд, ажал ябуулагшад, Россиин дэбисхэр дээрэ ажаллажа байдаг бусад үндэһэн театрнууд (Хальмаг, Татаар, Тыва, Саха, Хакаас болон бусад), Эрхүү можын, Забайкалиин хизаарай театрнууд, тиихэдэ Монгол ороной түлөөлэгшэд энэ баярта буужа ерэхээр хүлеэгдэнэ. Түрүүшын гурбан үдэшэ драматург Болод Ширибазаровай бэшэһэн «Театрай урлал байгуулга» гэһэн зохёолоор нааданууд Буряад Республикын урлалай габьяата ажал ябуулагша Баярма Жалцановагай найруулгаар табигдаха гэжэ бэлэдхэлэй хүдэлмэринүүд ябажа байна.
Буряад театр 1932 оной долоон һарын долоондо Намжал Балданогой «Таһалдал» гэжэ зүжэгөөр эгээл түрүүшын хүшэгэ нээжэ, тэрэ гэһээр наян жэлнүүдэй туршада үргэн олон харагшадтайгаа үдэр бүри уулзажа байна. Тииһээр, 1934, 1936 онуудта Ородой театрай үндэһэн дээрэ һуража гараһан түрүүшын буряад найруулагшадай бии болоһоор лэ, буряадай мэргэжэлтэ театр дүүрэн хүсэндөө хүдэлжэ захалаа гэмээр юм. Тэдэмнай хэд байгааб гэхэдэ Гомбо Цыдынжапов Мария Шамбуева хоёр бэлэй. Тииһээр өөһэдымнай мэргэжэлтэ зүжэгшэд бии боложо захалаа, нэрлэбэл мүнөө болотор аха наһанай харагшадай аманһаа һаладаггүй Ч. Генинов, Ж. Пагбаин, Н. Гендунова, В. Халматов, Н. Балдано, П. Николаев, У. Болдонова, Ю. Шангина болон бусад. Тииһээр Ленинград хотын театрай дээдэ һургуулиһаа хоорондоо зайтайгаар дүрбэн бүлэг, хожомынь Владивосток хотоһоо, байн манай Улаан-Үдын соёлой дунда мэргэжэлэй болон дээдэ һургуулиһаа гараһан артистнар мүнөө хүрэтэр театрайнгаа тайзан дээрэ арад түмэндөө бэлигээ бэлэглэн хүдэлжэ байна.
Арадайнгаа дундаһаа тодоржо, арадайнгаа баяр, гуниг тэгшэ хубаалдан ябадаг эдэ зүжэгшэдэйнгөө наада зугаа дэмжэжэ, театраараа дүүрэн сугларжа байдаг та олон харагшадтаа өөһэдынгөө ойн баярай ушараар гүнзэгы талархалаа мэдүүлнэбди. Эгүүридэ мүнхэ эдэ хоёрой эб эбдэршэгүй мүнхэ болтогой!
