1942 оной алтан шаргал намарай дунда һарын эхеэр аглаг үндэр һарьдагуудай арада Ахын аймагай түб Өөрлиг тосхондо түрэһэн тоонто, түрэл Буряадаа суурхуулха хубитай хүбүүн мүндэлжэ, алхам алхамаар ажабайдалайнгаа аянда гараһан байна. Ойнгоо баярые угтажа байһан алдарта хүбүүгээ амаршалхаяа тоонто нютагайнь, республикын засаг зургаануудай түлөөлэгшэд, соёл, урлалай болон бусад зохёохы ажалтан буряад театр соогоо гарахаяа байһан арбан һарын 26, 27-ндо сугларха, Владилен Пантаевай зохёохы үдэшэ үнгэргэгдэхөөр бэлэдхэл ябуулагдажа байна.
Владилен Пантаев эдир бишыхан һургуулиин наһанһаа хүгжэмэй талаар онсо бэлигтэй байһанаа харуулжа, дунда һургуулияа дүүргээд, Улаан-Үдын хүгжэмэй һургуулида ороод, эрхимээр дүүргэжэ гараһан байгаа. Хүгжэмэй һургуули дүүргээд, Зэдын аймагай түб Петропавловка тосхондо хүгжэмэй һургуулиин багшаар ажаллаа, тиигээд 1964 ондо Улаан-Үдэ ерэжэ, Буряадай академическэ драмын театрай хүгжэмэй таһагые даагшаар ажалда абтаад, бүхы наһаараа хүдэлжэ гараа.
Эдэ хэлэгдэһэн хуурай үгэнүүдэй саана жэлэй дүрбэн сагта үдэр һүнигүй хэжэ гараһан хэды ехэ томо томо бүтээлнүүд байна гээшэб? Театрай тайзан дээрэ табигдажа байһан бүхы зүжэгүүдые хүгжэмэй талаар шэмэглэхэ, тэдэ зүжэгүүд соо ороһон хэды олон дуунууд бэшэгдээб? Тэрээнһээ гадуур театрай тайзан дээрэ байд гээд лэ табигдажа байдаг концерт нааданууд… Владилен Даниловичай шэмэглэһэн зүжэгүүдые нэрлэхэ болоо һаа: Шираб-Нимбу Цыденжаповай «Дуранай хүсэн», Бата-Мүнхэ Пурбуевай «Толдойн хүбүүн Болдой» гээд лэ, Ардан Ангархаевай, Георгий Дашабыловай, Дугар Дылгыровэй, Даша-Рабдан Батожабайн, Ринчин Бадмаевай, Хуса Намсараевай болон бусад уран зохёолшодой, дүн хамта гуша гаран зүжэгүүд тоологдодог. Тэрэ тоодо Баяр Эрдынеевэй бэшэһэн «Хазаар хара һахал».
Энэ үдэшэдэ буряад театрай нэрэтэй түрэтэй артистнар, СССР-эй арадай артист Гомбо Цыдынжаповай нэрэмжэтэ оперо болон баледэй театрай гол дуушад Валентина Цыдыпова, Баатар Будаев, Лидия Галсанова, Дамба Занданов, тэдээнһээ гадна Россиин габьяата артист Хажадмаа Аюржанаева болон бусад Владилен Пантаевай олон шүлэгшэдэй бэшэһэн үгэнүүд дээрэ найруулһан дуунуудые дуулаха, юрэдөөл аялга хүгжэмэй дулаахан үдэшэнүүд болохоор хүлеэгдэнэ.
