2006 онhоо жэл бүри намарай сагта үнгэргэгдэжэ байдаг эхэ хэлэнэймнай Үдэр манай республика дотор жэлhээ жэлдэ үргэн дэлисэтэй болоhоор, hүүлэй жэлнүүдтэ уласхоорондын хэмжээндэ гараhан бэлэй. Энэ hайндэрэй түсэбтэ ороhон хэмжээ ябуулганууд энэ hарын 8-нhаа захалаа гэбэл: 8-нhаа 22 болотор үгтэhэн удхаар сүлөө бэшэлгэнүүд республикын hургуулинуудта буряад хэлэ үзэдэг hурагшадай дунда үнгэржэ байна. Энэл үедэ hурагшад, оюутад болон сэсэрлигэй хүүгэдэй дунда уран уншалгаар мүрысөөнүүд үнгэрнэ. Тиихэдэ арбан hарын 18-нда Хориин аймагта «Хориин, Яруунын, Хэжэнгын, Загарайн аймагуудта Буряад Республикын арадуудай хэлэнүүд тухай Буряад Республикын Хуулиин бэелүүлгын ябаса тухай» дүхэриг шэрээ үнгэрхэ. Тиихэдэ республикымнай түб Улаан-Үдэ хотын hуралсалай талаар хорооной үнгэргэхэ хэмжээ ябуулганууд олон. Ухаан бодол хүгжөөхэ зорилготой нааданууд мүрысөөнэй гуримаар 29-дэхи гимназида 16-нда, тиихэдэ 32-дохи hургуулида 19-ндэ үнгэрхэ, тэрэл 32-дохи hургуулида «Аяга сай эдеэнэй дээжэ» гэhэн түлэблэлэй арамнай болохо. Һарын туршада хотын hургуулинуудта «Багшын нэрэ нангин» гэhэн удхатай классуудай сагууд, Буряад Республикын үндэhэтэнэй номой hанда ошолгонууд, уран зохёолшод болон хүгжэм найруулагшадтай уулзалганууд, «Минии түрэл хото» гэhэн уран зурагай мүрысөөнүүд 7нгэрхэ байха.
Гадна энэ жэлэй «Буряад хэлэнэй Үдэрнүүдтэ» наhанай илгаануудаар уншалга дахажа бэшэлгэнүүд, үгтэhэн удхаар бэшэлгэнүүд, эрхим оршуулганууд, уран уншалганууд болон ухаан бодол хүгжөөхэ нааданууд элбэгээр хараалагданхай. Энэ жэлэй эрхим номуудай авторнуудтай (Цыдып Цырендоржиев, Цырен-Ханда Дарибазарова болон бусад), зүжэгшэдтэй уулзалганууд болохо.
Энэ hарын 24-ндэ Буряадай үндэhэтэнэй нэгэдэхи лицей-интернадта «Буряад хэлэн» гэhэн сахим номоор нааданууд мүрысөөнэй гуримаар үнгэрхэ юм.
