Энэ жэлэй «Буряад хэлэнэй Үдэрые» эмхидхэн байгуулагшад гэбэл:
= Буряад Республикын Правительство
= Буряад Республикын Арадай Хурал
= Буряад Республикын hуралсалай болон эрдэм ухаанай яаман
= Буряад Республикын соёлой яаман
= Бүгэдэ Буряадай үндэhэн соёлой эблэл
= Улаан-Үдэ хотын захиргаанай алай талаар хороон
Урда мэтэ энэшье жэдлэ буряад хэлэ дэлгэрүүлхэ, тэрэнэй хүгжэлтэдэ нүлөө оруулха удхатай хэмжээ ябуулганууд олоор үнгэрбэ. Республикын hурагшад болон оюутад найруулагнуудые бэшэлгын болон уран уншалгын мүрысөөнүүдтэ хабаадаа. Һүүлэй жэлнүүдтэ буряад хэлэн дээрэ буряад хэлэнэй хүгжэлтэдэ зорюулагдаhан сайтнууд, буряад аялга дуунуудтай сайтнууд бии болоо. Тиигэжэ эхэ түрэл буряад хэлэмнай хосорон ошоогүй, хүгжэжэл байна гээд анхармаар. Хүгжөөхэ ехэ хүсэншье байна, үргэлжэлүүлжэ ябаха хүсэл эрмэлзэлтэй хүүгэд, залуушуулшье байна.
Энэ жэлэй буряад хэлэнэй hайндэртэ республикын толгойлогшо Вячеслав Наговицын, Арадай Хуралай Түрүүлэгшэ Матвей Гершевич, Бүгэдэ Буряадай үндэhэн соёлой юрэнхылэгшэ Владимир Булдаев болон бусад тушаалта нюурнууд хабаадажа, арад түмэнөө амаршалжа, hайндэрэй үдэрнүүдтэ үнгэрhэн али олон хэмжээ ябуулгануудта шалгарагшадта Баярай тэмдэгүүд болон бэшэгүүдые, үнэтэ бэлгүүдые барюулhан байна.
Үндэhэн хэлэнүүдэй багшанарай Бүхэроссиин мүрысөөндэ шалгаржа, хоёрдохи hуури эзэлhэн Баярма Ванжиловада Буряад Республикын Правительствын Хүндэлэлэй тэмдэг барюулагдаба.
Энэ мэтэшэлэн үдэшын туршада олон шалгарагшадта бэлэг сэлэгүүд барюулагдаа, үнэтэй сэнтэй баярай үгэнүүд хэлэгдээ, энэмнай жэл бүри боложол байдаг хэмжээ ябуулганууд ха юм даа, жэл бүри шалгарhан зонууд тэмдэглэгдэжэл байдаг. Тиимэhээл гэхэ юм гү, али республикын засагай зургаануудай дэмжэлгэhээ гэхэ юм гү, үгышье hаа бүхы республикын hургуулинуудай, бусадшье ажаhуугшадай эбтэйхэнээр хабаадалгын үргэдэжэ байhанhаашье магад, буряад хэлэнэй энэ үедэ ямар байдалда байhан ушарые тобойлгожо тодорхойлhонhоошье гэмээр ха, юрэдөөл хэлэмнай даб дээрээ хосороод орхихогүй, хүгжэжэ байна, хаанаа хүрэжэ тогтохыемнай гү, али ото гаража хүгжэхыемнай ерээдүй гээшэмнай харуулхал юм бэзэ.
