Элинсэгэй урдандаа
Эбтэй hууhан буусанууд
Түүхэ болоод үнгэрбэш,
Түлиhэн дулаан гуламтань
Мүнөөш сэдьхэл жэгнэдэг,
Мүнхэ сагы hануулдаг...
…Мүнхэ сагай эрьеэн соо
Мүнхэ бэшэ наhан бии...
Хүн гээшэ хүрьhэтэ алтан дэлхэйн хүрьhэ гэшхэжэ ябаа сагтаа элинсэг гарбалайнгаа нютагые эгээл дээгүүр сэгнэжэ ябадаг ха юм даа. Элинсэг нютагынь Эрхүү можын Усть-Ордагай тойрогой Нүхэдэй аймагай Захали – эжын талаар, тиихэдэ Үнхэрлиг тосхон – эсэгын талаар.
Владилен Пантаев эдир бишыхан һургуулиин наһанһаа хүгжэмэй талаар онсо бэлигтэй байһанаа харуулжа, дунда һургуулияа дүүргээд, Улаан-Үдын хүгжэмэй һургуулида ороод, эрхимээр дүүргэжэ гараһан байгаа. Тиигээд, Зэдын аймагай түб Петропавловка тосхондо хүгжэмэй һургуулиин багшаар ажаллаа, 1964 ондо Улаан-Үдэ ерэжэ, Буряадай академическэ драмын театрай хүгжэмэй таһагые даагшаар ажалда абтаад, хүгжэмэй таһагые даагшаар бүхы наһаараа хүдэлжэ гараа. Эдэ хэлэгдэһэн хуурай үгэнүүдэй саана жэлэй дүрбэн сагта үдэр һүнигүй хэжэ гараһан хэды ехэ томо томо бүтээлнүүд байна гээшэб?
Театрай тайзан дээрэ табигдажа байһан бүхы зүжэгүүдые хүгжэмэй талаар шэмэглэхэ, тэдэ зүжэгүүд соо ороһон хэды олон дуунууд бэшэгдээб? Тэрээнһээ гадуур театрай тайзан дээрэ байд гээд лэ табигдажа байдаг концерт нааданууд…
Владилен Даниловичай шэмэглэһэн зүжэгүүдые нэрлэхэ болоо һаа: Шираб-Нимбу Цыденжаповай «Дуранай хүсэн», Бата-Мүнхэ Пурбуевай «Толдойн хүбүүн Болдой» гээд лэ, Ардан Ангархаевай, Георгий Дашабыловай, Дугар Дылгыровэй, Даша-Рабдан Батожабайн, Ринчин Бадмаевай, Хуса Намсараевай болон бусад уран зохёолшодой, дүн хамта гуша гаран зүжэгүүд тоологдодог. Тэрэ тоодо Баяр Эрдынеевэй бэшэһэн «Хазаар хара һахал». Энэ зүжэгые Россиин урлалай габьяата ажал ябуулагша Владимир Кондратьев найруулан табиhан юм.
Гунгаа Чимитовай үгэнүүд дээрэ бэшэгдэһэн дуун «Үнгын голой дангина». Россиин габьяата артист Дамба Занданов Буряадай арадай артист Лидия Галсанова хоёр дуулажа, Владилен Данилович энэ дуугаа хайрата эжынгээ – Ульяна Хутуровна Семёновагай гэрэлтэ дурасхаалда зорюулаа.
Владилен Даниловичай бүхы наhаяа зорюулhан түрэл театр тэрэнэй 70 наhанай ойн баярай үдэшые, наада зугааень бүхы дээрэнь өөр дээрээ даажа абаа, харагшын сэдьхэлдэ уянгата хүгжэм, дуун гээшэ үдэшын туршада шэнгэhэн байха.
Хүгжэм бэшэдэг хүнэй ойн баярта Чингис Павловай нэрэмжэтэ буряад арадай хүгжэмэй зэмсэгүүдэй оркестр Жаргал Тогтоновой ударидалга доро наадажа, үдэшые улам үзэмжэтэй болгожо шэмэглэбэ. Тиихэдэ бага оркестр байгуулагдаад, дуун бүхэндэ онсо жэгүүр ургуулба гээд анхарагдана. Эндэ нэрлээшье hаа болохо: Лимбэ – Балданцэрэнгийн Баттүвшин, иочин – Саяна Табхарова, морин хуур – Галсан Ошоров, синтезатор – Анатолий Бутуханов, бас-гитара – Эдуард Хайчиков, ударник – Юрий Мацуков, баян дээрэ өөрөө Владилен Пантаев…
Алишье сагта хүн гээшэ алтан дэлхэй дээрэ амидаржа ябахадаа түрэһэн һайхан тоонто нютагайнгаа ашыень харюулхаа ябадаг ха юм даа.
Хүлеэгээд намайгаа байгаарай,
Хүрэхэб даа бусажа шамхандаа.
Альгандаа үргэжэ табиhандаш
Ашыеш харюулхаа ябанаб даа…
