Буряад арад өөрынгөө бүхы түүхэ соо баян удхатай заншал гуримуудаа хойноhоонь ургажа ябаhан үри бэедээ үе дамжуулан хүргэдэг нангин гуримтай юм. Тиимэhээл үе сагуудай hамаргаан соогуур үгы боложо хосороогүй ёhо заншалнууднай hүүлэй сагуудта шэнэ хүсөөр эршэеэ абан, бишыхан хүүгэдhээ эхилээд залуу hүрэгтэ ойлгуулгын ехэ хүдэлмэри ябуулагдажа эхилэнхэй. Хүүгэд, залуушуул буряад удхатай наада-мүрысөөнүүдтэл хабаадахадаа үбгэ эсэсгынгээ ёhо гуримуудые, алтан hургаалнуудые гансашье уураг тархидаа бэшэ, бүхы зүрхэ сэдьхэлдээ шэнгээжэ, ойлгожо, хадуужа абана ха юм. Тиимэ залуушуулай ургажа байхада тэдэнээ дэмжэхэ маанарайл – аха захатанай нангин уялга болоно гээшэ. Иимэл удхатай, иимэл зорилготой «Эдир Будамшуу» гэhэн мүрысөө-нааданууд эдиршүүлэй дунда эмхидхэгдэhээр, хэдэн олон жэлнүүдэй туршада амжалтатай ябажа байна. Эдэ жэлнүүдэй туршада дэлхэй дээрэ хаана ямар буряадууд ажаhуунаб, бултандань хүрэгдөө, хаанашье ябахада олон тоото хүүгэдэй дундаhаа түрэхын бэлигтэй, энэ хэрэгтэмнай онсо хандасатай хүүгэд тодороод лэ байдаг. Тиигэжэ «Эдир Будамшуу» гэжэ мүрысөөмнай жэлhээ жэлдэ үргэдэжэл, хабаадагшадайнь тоо олошоржол байна гэжэ энэ ехэ хүдэлөөнэй эхин дээрэ байhан Россиин арадай артист Михаил Елбонов бодолоо элирхэйлнэ. Энэ жэл шангай hууринууд яажа тодорооб гэбэл:
Амгалан Ухинов (Баргажан) – «Океан» лагерьта түлөөhэгүй амарха эрхэдэ хүртөө.
Шангай гурбадахи hуурида Юрий Хубанов (Хурамхаан), хоёрдохи hуурида Максим Вахрушев (Баргажан), нэгэдэхи hуурида Монголой түлөөлэгшэд Алтангэрэлын Ордил Баярсогтын Сэмбэл хоёр.
Гран-при шагналда Агын тойрогhоо ерэhэн Ананда Зыдыглаев хүртэбэ.
